MÊRDÎN - Welatîyê ke taxa Cumhurîyetî ya Mîdyatî de ciwîyenê, dîyar kerdî ke pêwa vengdayîşê, 'keyeyê xo de bê' vera vîrusê korona bi hewteyêko awa înan ameya birnayene û vatî hênî û çalan ra hewcedarîyê xo peyda kenê. Welatîyan da zanayene, pêwa ke bi desan rey muracat kerdê la netîce nêgirewtê.

 

Mêrdîn de heta nika seba vîrusê korona 8 taxî kewtî binê karantîna û pêwa vengdayîşê, 'keye de bimanê' zî welatî mecbûr manenê ke vejîyê teber. Yew nê cayan ra taxa Cumhurîyetî ya girêdayê qezaya Mîdyatî ya Mêrdînî ya. Ame zanayene ke bi hewteyan o awa înan ameya birnayene. Taxa ke 6 hezar nufûsê ci esta, ame vatene ke pêwa waştişname û muracatê welatîyan yê seba Îdareyê Kanalîzasyon û Awe ya Mêrdînî (MARSU) problem nêameyo çareserkerdene.

 

Welatîyan da zanayene ke seba tehdîdê vîrusî bi endîşeyîn ê û hewcedarîyê awe bîran û hênîyan ra peyda kenê û vatî, ganî problem lezabez bêro çareserkerdene.

 

'Vanê ke keye de bê la awe nêdanê'

 

Çelîk Şîrînî reaksîyonê xo ard ziwan û vat: "Her serre ma eynî çî ciwîyenê. Awe yena birnayene. Hewteyêko nênê. Dima ra çend rojî di saetî awe vera danê û reyna padanê. Ma waştişname şirawenê, gerre kenê. La çîyêk nêno kerdene. Nê rojanê vîrusî de vanê ke keye de bimanê. La ma bê awe yê. Vanê, keye de bê la awe vera nêdanê."