AMED - Dayîka hepsîya nêweş Leyla Uyanike ke zîndanê Cinîyan ê Sîncanî de manena, Şehrîban Uyanike dîyar kerde ke yê ke nê qanûnî vetê, wa destê xo bidê serê wijdanê xo û domananê înan verê çiman ra derbaz bikerê û vat, domanê înan nika binê tehluke de yê.

 

Dimayê qanûnê înfazî ke meclîsî ra derbaz bi, munaqeşeyî dewam kenê. 3in Paketa Hukmî ke 70 madeyî ci de ca gênê û bi rayanê AKP-MHPyî ra ame tesdîqkerdene û nê dir yeno pawitene ke 90 hezarî hepsîyê edlî serbest bêrê veradayene. Hepsîyê sîyasî zî nê qanûnî de ca nêgirewtî. Keyeyê hepsîyan reaksîyon vera rewşa dayî û dîyar kerdî ke no nîno qebulkerdene. Dayîka hepsîya bi nameyê Leyla Uyanike ke zîndanê Cinîyan ê Sîncanî de manena, Şehrîban Uyanike reaksîyon vera qanûnî da.

 

Şehrîban Uyanike ajansê ma rê qisey kerde û da zanayene ke no qanûno ke meclîs ra derbaz bîyo û hepsîyê sîyasî tede ca nêgînê, nîno qebulkerdene.

 

'Bi xidarîyêk pîl kênaya mi rê îşkence kerdî'

 

Şehrîbane dîyar kerde ke kênaya aye Leyla, 2016 de qedexeyê tebervejîyayîşê kuçeyanê Sûrî de ameya tepiştene û vat: "Kêna mi bi îşkence ameye tepiştene. 4 mengî zîndanê Tîpê E yê Amedî de mende. Dima ra surgunê Sîncanî kerdî. Gama ke destbend kerdibî, parsûyê aye şiknayîbî. Zince û dindananê ci şiknayîbî. Îşkenceyê giran bi ci kerdî. 5 serrî yo tepiştî ya. Grevê veşanî de xeylêk zehmetî ant. Nika hem çiman, hem zî dindananê xo ra nêweşa. Serra vîyarte de gurçikanê ci de kerra ameye tespîtkerdene. Tena reyke berdî nêweşxane. Çîyêk nêkerdî û şirawitî."

 

‘No qanûn ma xemgîn kerd'

 

Şehrîbane da zanayene ke domanê înan bê suc ê û vat: "Yewin sucê domananê ma Kurdbîyayîşê înan o. Homayî ma Kurd viraşt. Şerê ke vera ma kenê, esas de vera Homayî kenê. Domananê ma dizdî nêkerda, kesêk nêkiştê, çîyêk xirab nêkerdê. Domananê ma waşt sey Kurdan bêrê nasnayene. Nika zî ma bî şahidê qanûno newe. Rastî de zî ma dewlete ra çîyêk nêpawitêne. Qanûnê winasî her wext seba dizdan û kiştoxan bi feyde bî. Bi serran o ma şahidê nê çî yê. No qanûn ma zaf xemgîn kerd. Semedo ke nika domanê ma binê tehlûkeyêk pîl de yê."

 

'Eke ma bimirê şima do zî bimrê'

 

Şehrîbane dewam de vat ke zîndanan de tedbîr nênê girewtene û vat: "Gardîyanî bê lepik û maske geyrenê. Şonê verê domananê ma û yenê. Heta domananê ma tehdîd zî kerdê. La domanê ma înan ra nêtersenê. Merg ra nêtersenê. Domanê ma xeylêk çî ciwîyayî. Gardîyanna domananê ma ra vato, 'eke ma bimirê, şima do zî bimirê.' Her wext winasî têgeyrenê. Zîndanan de problemê pakîtî esto. Dimayê vîrusî çîyan vay kerdî. Gardîyanî wexto ke werd vila kenê, lepikan xebitnenê. Bi eynî lapikan destê xo danê her ca. Ma xeylêk bi endîşeyîn ê. Ganî wayîrê hepsîyê sîyasî bêro vejyayîş. Ganî hepsîyê sîyasî serbest bêrê veradayene."