ENQERE - Dadîya parlementerê verênî yê HDPyî Abdullah Zeydanî Kayser Zeydane vizêr verî ke lajê xo bivîna dinyaya xo bedilnaye. Kaysere vatêne qey lajê ci teberê welatî de yo.

 

Parlementerê verên ê Partîya Demokratîke ya Şaran (HDP) yê Colemêrgî Abdullah Zeydan Zîndanê Edîrne de tepişte yo. Dadîya 80 serre ya Abdullah Zeydanî Kayser Zeydane vizêr dinyaya xo bedilnaye. Dadîye Kaysere wextêkê dergî ra nata nêweşîya xo ya kronike ra Enqere de nêweşxane de ameyêne weşkerdene. Cenazaya Kaysere rîyê vîrusê Korona ra nêerşewîyaye qezaya Geverî ya Colemêrgî û qezaya Mamakî ya Enqere de hetê keyeyê ci ra ameye definkerdene.

 

Kayser Zeydane 4ê kanûna 2016î ra nata lajê xo Abdullah Zeydan nêdî û vatêne qey lajê ci teberê welatî de yo. Dadîye Kayseri têna telefon de Abdullah Zeydanî reyde qisey kerdêne. Dadîye Kaysere lajê xo nêdî û dinyaya xo bedilna.