AMED - Fevzîye Kolakane ke yew ci ra nêweş di domanê aye zîndan de yê, reaksîyon vera paketa hukmî da û vat: "Hema ke yew hepsîyêk çîyêk nêbîyo, ganî zîndanî bêrê vengkerdene. Gelo do dimayê mergî serbest bêrê veradayene?"

 

3in Paketa Hukmî ke bi rayanê AKP-MHPyî Meclîs ra derbaz bî, hepsîyê sîyasî ci de ca nêgirewtî. Reaksîyonî vera nê her ke şonê zêde benê. Keyeyê hepsîyan vera nê bêveng nêmanenê. Yew înan ra zî dayîka Fevzîye Kolakane ya. Lajêke ci Ahmet Kolakan, zîndanê Tîpê T yê Bandirma ê Balikesîrî de tepişte yo û Mahsun Kolakan zî zîndanê Tîpê T yê Sêwregî yê Rihayî de tepişte yo. Fevzîye da zanayene ke aye seba rewşa domananê xo bi endîşe ya.

 

Pêwa ke rapor esto serbest nîno veradayene

 

Fevzîye dîyar kerde ke lajêke ci nêweş o û wina vat: "No qanûno ke do bêro caardene, bi tu hawa nîno qebulkerdene. Lajê mi Ahmet nêweş o. Zîndanê Tîpê T yê Bandirmayî de tepişte yo. Pêwa ke raporê ci esto zî serbest nêno veradayene. Rewşa weşîye ci baş nîya. Cezaya mubetî ci rê ameya birnayene. 26 serrî yo tepişte yo. Xeylêk nêweşîyê ci estê. Rapora ci esto. Milê xo ra birîndar o. Kapaxê qelbê ci de problem esto. Linge û gurçikanê xo ra nêweş o. Pêwa raporê ci esto nîno veradayene. Lajê mi Mahsun zî 6 serrî yo hepsî yo. Zîndanê Tîpê T yê Sêwregî de yo. Şertê zîndanan werte de yo. Ma seba rewşa domananê xo bi endîşeyê."

 

 ‘Gelo dimayê merdişî do serbest vera bidê?'

 

Fevzîye tewr peyîn qalîkerdişê xo de vat ke ganî pêro hepsîyê sîyasî çarçewaya qanûnî de ca bigîrê û vat: "Ma nêwazenê zîndanan de merdiş bibo. Kesêk zî bimiro, do wezaretê dade berpirsîyar bo. Gerek kezeba tu dayîkêke nêveşîyo. Gelo dimayê ke merdî do serbest vera bidê? Xeylêk kesî vera danê la domananê ma vera nêdanê. Taybetî sîyasîyan vera nêdanê. Ma qanûnê înan qebûl nêkenê. Ganî domanê ma serbest bêrê veradayene. Ma seba înan endîşeyîn ê."