AMED - Zubeyde Tamîra ke dayîka hepsîyan a, reaksîyon vera pakete da û vat: "Lajêke mi nêweş o. No komplo yo. Kurdan ver bi mergî benê, kezaba ma veşena. Ma nêeşkenê çîyêk vajê. Wa ganî heme hepsî serbest bêrê veradayene."

 

3in paketa hukmî yê Heyetê Pêroyî yê Meclîsî bi rayanê MHP û AKPyî ame qebulkerdene. Pakete de hepsîyê sîyasî ca nêgirewtî. Merdimê hepsîyan reaksîyon vera rewşe dayî û endîşeyê înan her ke şonê pîl benê. Dayîka di hepsîyan, Zubeyde Tamîre endîşeyê xo qalî kerde.

 

Zubeydeye da zanayene ke lajêke ci Şakran Alîaga û lajê ke ci zî zîndanê Bunyan ê Qeyserîyî û vat: "Lajê mi Ahmet Tamîr nêweş o. Bi seran o şertê giran de yeno tepiştiş. 26 serrî yo tepişte yo. Pîzeyê o ra nêrehet o. Cezaya muebetî ci ra ameya birnayene. 4 domanê ci estê. Pîlbîyayîşê domananê xo nêdî. Xeylêk bêrîya domananê xo keno. Zîndanê ke ci de nêmendo çin o. Ma bi endîşeyîn ê. Hewn nêkewêno çimanê ma."

 

'Wa serbest bêrê veradayene'

 

Zubeyde da zanayene ke emrê Ahmetî pîl o û komanê rîskî de ca gêno û wina vat: "Doktor nêşino verê înan. Nînê dermankerdene. Nêweşîya Ahmetî giran a. Na nêweşîye ma perîşan kerd. Ma her wext domananê xo fikrîyenê. Ganî zîndanî bêrê vengkerdene. Lajê min o Erkan Tamîr zî 6 serrî yo tepişte yo. Erkan zî şertê giranan de yeno tepiştene. Erkan, zîndanê Şakran ê Alîaga de yo. Erkanî vat, 'kesêko nêweş ardî verê ma. Ma pêro nêweş ê. Ma nêbenê nêweşxane. Hepsîyêko nêweş esto tîya. Îdare, koxuş bi koxuş geyreneno. Derheqê vîrusî de zî tu tedbîr nîno girewtene."

 

'No komplo yo' 

 

Zubeyde tewr peyîn, reaksîyon vera qanûnî da û vat, bi tu hewa qanûn qebul nêkenê û vat: "Kiştoxî, dizdî û tecawizkarî serbest yenê veradayene. La ê sîyasî yenê tepiştene. Na rewşe komplo ya. Verê çiman de Kurdan terkê mergî kenê."