Şehrîban Abî

 

QERS - Hemsereka HDPyî ya Qersî Sevda Subaşî dîyar kerde ke paketa hukmî de hepsîyê sîyasî ci de ca nêgînê û di serrî verê ameya amadekerdene, eleqeyê ci bi vîrusê korona çin o û vat: "Hesab kenê ke rayîrêk bivînê û dizdan, çeteyan û dişminê cinîyan vejê teber."

 

Tirkîya de seba vîrusê korona, tablo her ke şono giran beno û hûmara kesê ke merdî hezar û 296 heb ê. Mîyanê tedbîrê ke vera vîrusî bêrê girewtene, rewşa hepsîyan zî bi. AKP û MHPyî pakêtêke hukmî bi 70 madeyan ardî rojeve. Pakete de ame vatene ke gumanbarê, ‘şîdetê serê cinîyan, îstîsmarê cindî' ca nêgênê. La pêvînayîşan de vejîya meydan ke na rewşe rastî ramojnena. Verê nê de hepsîyê sîyasî bi tu hewa ci de ca nêgênê.  

 

Reaksîyonê sazgehê komelê sivîl, muxalefet û merdimê hepsîyan vera pakete de dewam keno.

 

'Do gumanbar serbest bêrê veradayene'

 

Hemsereka HDPyî ya Qersî Sevda Subaşi vat pakete, zîhnîyetê serdest ya camêrdan rê xizmet kena û wina vat: "Seke gumanbarê Berfîn Ozeke ke rastê hêrişê kezapî amebî, do xeylêk gumanbarê winasî serbest bêrê veradayene. Serbest veradayîşê gumanbarê ke şîdet cinîyan rê kenê, bi tu hewa merdim nêeşkeno qebul bikero. No qanûn edeletî rê xizmet nêkeno û şermê tewr pîl o."

 

'Gerek seba hepsîyê sîyasî çareserî bibo'

 

Sevdaye dewam de vat ke hepsîyê sîyasî binê tehluke de yê û vat: "Îqtîdar bi vîrusî dir têkoşîn nêkeno, bi dişminî vera Kurdan, cinî, şorişgir û sosyalîstan planê vernî de yo. Hepsî bi rîskê vîrusî dir ameyî rî bi rî. Tedbîr nênê girewtene. Hacetê pakîtî nînê dayene. Gerek vernê de seba înan çareserî bêro vînayene."

 

'Maskeyan hepsîyan rê roşenê' 

 

Sevdaye tewr peyîn da zanayene ke bi xeylêk keyeyê hepsîyan dir têkilî de yê û da zanayene ke hîjyen, zîndanan de çin o. Pêro hacetî bi vayîyêk pîl kantînan de yenê rotene. Maskeyî zî bi pere yenê rotene.

 

Sevda qiseykerdişê xo wina qedêna: "AKP-MHPyî di serrî verê paketa înfazî amade kerd. Hesab kerdêne ke rayîrêk bivînê û çete û dizdan vejê. Seba nê zî vîrus semedê înan bi îmkan."ha