Zeynep Durgut – Şehrîban Aslan

 

COLEMÊRG - 5 birayî zîndanê cîya cîya de yenê tepiştene. Dayîka 5 hepsîyan, reaksîyon vera Qanûnê Înfazî da û vat ke êdî omidê ci edaletî rê nêmendo.

 

Tirkîya de bi vilabîyayîşê vîrûsê koronayî (COVÎD-19) seke tedbîr, hukmatî zî lezabez da amadekarîyê qanûnê Înfazî. Qanûnê Înfazî ke hetê AKP û MHPyî ra ame amadekerdene û pêşkêşî parlementoyî ame kerdene, hetê Komîsyonê Edaletî yê parlementoyî ra ame qebulkerdene. Qanûnê Înfazî ke 70 madeyan ra yeno meydan, dimayê munaqeşeyan ame qebulkerdene. Bi nê vurnayîşî dir yeno pawitene ke 90 hezarî hepsî serbest bêrê veradayene. La hepsîyê sîyasî nê heqî ra bêpar ameyî veradayene. Nê qerarî dir bi hezaran hepsîyê nêweşî bi merdiş dir rî bi rî mendî. Her cayê Tirkîya de vera nê qerarî de reaksîyonî zêde benê.

 

Zîndan de 5 birayî bi nameyê Firat (31), Mûrat (30), Alî (25), Recep (24) û Ferhat Ertûnç (20) estê. Firat Ertûnç Zîndanê Tîpê D yê Amedî, Mûrat û Recep Zîndanê Tîpê F yê Tekirdagî û Alî û Firat Ertûnç zî Zîndanê Tîpê F yê Wanî de tepişnayeyê. Dayîka înan Şermîn Ertunçe reaksîyon vera qerarî da û vat ke êdî omidê ci edaletî rê nêmendo.

 

'Tena yew nîyo, 5 kesê do zerrîya mi seba kam ci biveşo?'

 

Şermîne arde ziwan ke domanê aye tu kesî nêkiştê û vat bi domananê xo serberz a û wina vat: "Nika zîndan de 5 domanê mi estê. Heme zîndanê cîyan de yê. Bi serran o ma zulm vînenê. Seba ke îmkanê ma çinbî, ma nêeşkayî şêrê serdayîşê pêrûne. Eke no zulm nîyo, çi yo? Ez bi domananê xo serberz a. Bi 11 serrî yo ke rayîrê zîndanan de ma şonê û yenê. Ma dayîkî bi domananê xo dir ciwîyenê, eke domanê ma çinbê ma zî çin ê. Her panc domanê mi zî bêsuc zîndan de yê. Ez nêzana ke bi tehdîkêko senîn dir rî bi rî yê. Zîndan de çiqas eşkenê xo bipawê? Bê înan nan qirêke mi ra nêşono war. Şewe û roj ez înan fikrîyena. Tena  kesêk nîyo, 5 kesê. Zerrîya mi serê kam ci de biveyşo? Pakete de seba hepsîyê sîyasîyan çîyêk çinbi. No bê edaletî yo. Reyna esrarkeş,dizdî û kiştoxê cinîyan feyde girewtî. Wa nê welatî de tena reyke edalet qisey bikero û bêro bi ca bîyayene."

 

'Omidê mi edaletî rê nêmend'

 

Şermîne tewr peyîn bale ante serê vîrusî û vat: "Vîrusê korona her ke şino Tirkîya de vila beno. Hûmara merdişan resa bi hezaran. Eke no çî bikewo zîndanan, tu hêz nêeşkeno vernî bigîro. Semedo ke îmkanê zîndanî zaf tay ê. Çira dizd û tecawizkar serbest yenê veradayene? No çi dişminî yo? Êdî omidê mi edaletî rê nêmend. Ma dayîkî cuya ke bê domananê xo nêwazenê. Ma wazenê pêro hepsî serbest bêrê veradayene. Wa tu dayîk, tu keye nê qanûnê înfazî qebul nêkerê. Encax veng û têkoşînê ma eşkeno domananê ma azad bikero. Ma dayîkî şer û pêrodayîşan nêwazenê, ma edalet wazenê."