MÊRDÎN - Dayîka hepsîyê bi nameyê Memduh Şîmdîyo ke zîndanê Tîpê E yê Mêrdîn de hepsîyo, Şemme Şîmdîye da zanayîş ke maskeyan nêdanê hepsîyan û vat: “Eke çîyêk bi lajê mi bo, do kam hesabê ci bido.”

 

Semedê vîrusê korona Tirkîya de hûmara kesê ke merdî, hezar derbaz kerd. Zîndanan de zî rîsk giran beno. Qanûnê înfazî yê newe de ca nêdayî hepsîyê sîyasîyan û her roje xeberê ke tedbîr nînê girewtene yenê. Vera vîrusî, bi taybet îqazkerdişê xebitnayîşê maskeyan yeno kerdene la Zîndanê Tîpê E yê Mêrdînî de ame zanayene ke tu tedbîr nêameyê girewtene û maske nêameyê dayene.

 

‘Serê nameyê pakitî de tu xebate çin a’

 

Dayîka hepsîyê bi nameyê Memduh Şîmdî, Şemme Şîmdîye ke tewr peyîn bi telefon lajê xo dir qisey kerda û nê çî ardî ziwan: “Lajê mi vat, rewşe baş nîya. Serê nameyê pakitî de tu çîyêk nêameyo kerdene. Bê suc bi 7 serrî yo zîndan de yo. Domanê ci bendeyê ci yê. Verê ke biko zîndan, problemê weşîye cuyayîne. Nika nêeşkeno boya xo bigîro û bido. Gelo bi nê vîrusî dir merdişê înan pawenê? Xeylêk hepsîyê nêweşî estê. Labelê nê prosesî de nêeşkenê şorê revîr zî.”

 

‘Pêwa ke maske wazenê zî nêdanê’

 

Şemme dîyar kerde, pêwa ke maske wazenê zî nêdanê û vat: “Lajê mi vat, ‘xêrcê gardîyanan kes maske nêxebitneno.’ Hepsî wazenê la nêdanê înan. Her roje bi gardîyanan dir yenê rî bi rî. Pêvînayîşê telefonî de zî pêro yenê têhet. Gelo rewşêka wina de, do vîrus vila nêbo? Wa domanê ma serbest bêrê veradayene. Nika merdişêk bibo, do kam se bikero? Wa domanê ma serbest bêrê veradayene.”