ENQERE - Hemsereka Pêroyî ya SESî Gonul Erdene, derheqê babeta ekîbanê tibî yê vera vîrûsî ke Tirkîya de ameyê weçînayene û semedê welatê bînan ameyê şirawitiş şîrove kerde û vat: "Welatîyan ra pere kom kenê û pêwa heme kêmîyan, înan şirawenê welatê bînan. No populîstbîyayîş o.”

 

Tirkîya seba vîrusê korona, semedê welatanê Îngîlîstan, Ispanya, Lîbyayî û xeylêk welatê bînan ke kêmîyê înan ê ekîpmanan esto, maskeyê N95 û xeylêk hacetê bînî eşrawitî. Hemsereka SESî ya  Gonul Erdeme dîyar kerde ke Tirkîya de kêmîyê ekîpmanan esto û xebatkarê weşîye nênê pawitene û reaksîyon vera rewşe da.

 

'No populîstbîyayîş o'

 

Gonule da zanayene ke piştdayîşê welat û teberê welatî her wext girîng o û gerek bêro kerdene û qalîkerdene xo wina dewam kerde: "La heta ke kêmîyê welatî nêrê çareserkerdene, seba welatê bînan hetkarî nêzdîbîyayîşêk populîstîkbîyayîş  o. Şima welatê xo de babeta temînkerdene ekîpmanan ê seba xebatkaranê xo de problem ciwîyenê. Şima lazimîyê înan bi ca nêanê. Semedê nê welatê bînan rê şirawitişê ekîpmanan nêno famkerdene. Eke welat de rewşêka winasî çinbîbayîne, lazimîyê şima bi ci çinbibayîne, merdim eşkayîne bi rehetî hetkarî bikerdêne. La seke ma pêro zanê ke Tirkîya na babete de probleman ciwîyena."

 

'Welatîyan ra pere kom kenê, welatîyê bînan rê zî hetkarî kenê'

 

Gonule tewr peyîn qiseykerdişê xo de dîyar kerde ke karkerî hema zî mecbûrî xebityenê û seba hemwelatîyan piştdayîş nîno dayene û vat: "Na nuqta de seba keyeyê feqîran, hetkarî nîna kerdene. Hesabêko piştdayîşî netewî yeno akerdene, kampanyayêke yena destpêkerdene, welatîyan ra pere yeno komkerdene. Pêwa înan, seba welatê bînan hetkarî yena şirawitiş. Bi rastî no nîno famkerdene."