MERKEZÊ XEBERAN - Goreyê bîlançoya peynî, Îran de 24 saetanê peyênan de 125 kesê bînî merdî û tewrê înan hûmara merdeyan resaye 4 hezar û 357 kesan. 

 

Roj bi roje dinya de bîlançoya Vîrusê Korona (Covid-19) giran bena. Wezîrîya Weşî yê Îranî da zanayene ketena 24 saetanê peyênan de 125 kesê bînî vîrus ra merdî. Wezîrîye dîyar kerde ke mîyanê 24 saetanê peyênan de hezar û 837 kesanê bînan de vîrus ameyo tespîtkerdene. Sewbîna ame zanayene ke hepsîyêk kurd ke fîrar kerdbî ameyo daliqnayene. 

 

Goreyê dayeyanê wezîrîye, Îran de hûmara kesanê ke bi vîrus kewtî resaya 70 hezar û 29 kesane û heta nika 4 hezar 357 kesî zî vîrus ra cuya xo vindî kerdî.

 

Hepsîyo sîyasî ame daliqnayene

 

Hepsîyo kurd Mistefa Selimî 27ê adare de tewrê xeylê hepsîyanê bînan Zîndanê Seqizî ra fîrar kerdbî û tewrê çend kesanê bînan verê xo dabî Başûrê Kurdistanî. Labelê hetê hêzê asayîşî yê Herêma Kurdistanî ra ameybî tepiştene û teslîmê hukmatê Îranî ameybî kerdene. Goreyê xebera Heqê Merdiman ya Kurdistanî Mistefa Selîmî ewro hetê serê sibayî Zîndanê Seqizî de ameyo daliqnayene. Eynî çime da zanayene ke cenazeya Mistefa teslîmê keyeyê ci ameya kerdene.