WAN - Hepsîya bi nameyê Semîra Erbogaya ke zîndanê Tîpê T yê Wanî de tepişteya, pêvînayîşê bi keyeyê xo dir kerde vat ke  seba vîrusî,  hûmartişê hewşeyî rewşa varanî de yenê kerdene, qebûl nêkenê û seba nê zî derheqê înan de zabitname yenê nuştene. Dayîka semîraye, Gulîzar Erboga zî da zanayene ke nê caardişî kêfî qebûl nêkenê û vat: “Qanûnê înfazî de hepsîyê sîyasî nêameyî bicakerdene. No zî nêzdîbîyayîşê hukmatî vera kurdan ramojnenê.

 

Semîra Erboga ke Zîndanê Tîpê T yê Wanî de tepişteya, cezaya muebetî û verê nê de serrî cezaya bîn zî ameya birnayene û nêweşa tansîyonî ya. Semîra bi pêvînayîşê keyeyê xo dir dîyar kerde ke seba vîrusê koronayî hûmartiş hewşe de yeno kerdene û vat, varan de zî ê vejenê. Semîra pêvînayîş de dîyar kerde ke seba wextê varanî de hûmartiş qebûl nêkerdî, derheqê înan de zabitname ameyê girewtene û eynî wextî de da zanayene ke vera vîrusî tu tedbîr nêameyê girewtene.

 

Dayîka Semîra, Gulîzar Erboga çîyê ke kênaya aye pêvînayîş de neql kerd wina vat: “Semedê vîrusî teber de hûmartene yena kerdene. Hewayê varanî de ma vetî teber. La seba ke varan varayne ma qebûl nêkerd. Vatî no helwestê şima çalakî yo û zabotname girewtî.”

 

‘Kêna mi nêbenê nêweşxane û revîr’

 

Gulîzare da zanayene ke kêna aye nêweşa hîpertansiyonî ya û tansîyone daya çimê aye ro û vat: “Tansîyona aye her wext berz bena. Gerek her wext bêra taqîbkerdene. Bi di hewteyo ke her wext tansîyonê aye berz bena. Hewteyo vîyarte de avûkatê ci bi mudurî dir pêvînayîş kerd. Waştişname dayî. La reyna zî çîyêk nêvurya. Dermanê xo yê verê xebitnena. Lîmon û sîr xebitnena. Nê zî feyde nêkenê. Çîyêk zî feyde nêkeno.”

 

‘Amancê înan hepsîyê sîyasî bimirê’

 

Gulîzare wina qedêna: “Lajê mi Firat Erboga zî zîndanê Asayîşê Berzî yê Tîpê T yê Wanî de 4 serrî yo bi hawayêko bêhuqûqî yeno muhakamekerdene. Seke lajê û kêna mi bi hezaran hepsîyê sîyasî estê. Amancêk înan esto. Wazenê hepsîyê sîyasî bimirê. Qanûnê înfazî de dişminîyê vera Kurdan reyke bîn ramojnayî. Ma wazenê înfaz bitêduşt bêro bi ca ardene.”