MÛŞ - Muhlîse Karaguzele verê hemsereka HDPyî ya Mûşî bî û pêwa nêweşîyanê aye kronîkan, nika zîndan de ya. Kênaya Muhlîseye, Zîlan Karaguzele veng da raya pêroyî û vat: “Ma nêeşkenê dayîk, pî, wayê, bira û embazanê xo terkê mergî bikerê. Ganî ma destûr nêdê nê çî.”

 

Vîrûsê koronayî seranserê Tirkîya de vila bi. Bi vilabîyayîşî dir ters û endîşeyê keyeyê hepsîyan zî tewr pîl bi. Nika bi seyan hepsî bi nêweşîya şubeyî dir rî bi rî yê. Yew înan ra Hemseraka verê ya Partîya Demokratîkî ya Şaran (HDP) ya Mûşî Muhlîse Karaguzele ya.

 

Muhlîse menga tebaxe serra 2019ine de bi sebebê, "endama rêxistine ya” ameya tepiştene û aye neqlê Zîndanê Tîpê E yê Mûşî kerdî. Muhlîse 57 serrî ya û seba nêweşîya astim, tansîyon û şekirî seke bi hezaran hepsîyê nêweşan zehmeyî ancena. Pêwa ke raporê aye ke nêeşkena zîndan de bimano esto zî aye surgunu Zîndanê Cinîyan ê Bunyanê Kayserîyî kerdî.

 

Wexyo ke ameye surgunkerdene zî keyeyê ci ra nêame vatane. Dimayê çend mengan dima, merdimê Muhlîse şî serdanê ci. Kênaya Muhlîseye, Zîlan Karaguzele bale ante serê rewşa dayîka xo û vat: “Heqê bi hezaran hepsîyan, yeno îhlalkerdene. Zîndanan xeylêk nêweşê hepsî estê û bi şube dir ters û endîşeyî zêde benê. Hepsîyê ke 65 serre û serê 65 serrî ra estê, hepsîyê cinî yê bi domananê xo dir manenê zî estê. Ma nêeşkenê dayîk, pî, wayê, bira û embazanê xo terkê mergî bikerê. Gerek ma destûr nêdê nê çî. Ma wazenê selahîyetdarî goreyê pêameyîşê mîyanneteweyî têbigeyrê.”

 

Zîlane tewr peyîn wina vat: “Huqûqê dişminî ney, ganî huqûqê unîversalî bi ca bîyarê. Waştişê ma waştişêko merdimayî yo. Ma înfazî de têduştî wazenê. Eya, ciwîyayîş keye de beno, zîndanan de ney.”