STENBOL - Ame îdîakerdene Zîndanê Tîpa L Hûmara 5. yê Sîlîvrî de testê 2 hepsîyanê sîyasî pozîtîf vejîyayo û herinda ke înan bikerî karantîna tepîya erşawitî qawişan.

 

Ame îdîakerdene Zîndanê Tîpa L Hûmara 5. yê Sîlîvrî de testê Vîrusê Korona (Covid-19) ê 2 hepsîyanê sîyasî pozîtîf vejîyayo û herinda ke înan bikerî karantîna tepîya erşawitî qawişan. Sewbîna zî 3 hepsîyan de nîşaneyê nêweşî esto.

 

Serekê Komeleya Heqê Merdiman (ÎHD) yê Şûbeyê Stenbolî Gulseren Yolere derheqê babete de qisey kerde. Gulserene qiseykerdişê xo de wina va: “Hepsîyo bi nameyê M.A. ke Sîlîvrî de maneno bi telefon merdimêk xo reyde qisey kerdo û tay zanayîşan dayo ma. Zanayîşê ke merdimê M.Ayî da ma  wina yo; Testê Covid-19 yê hepsîyanê bi nameyê Z.S. û H.P.yî pozîtîf vejîyayî. Herinda ke înan bikerî karantîna tepîya erşawitî qawişan. Badê ke Z.S. û H.P. kenî qawişan hepsîyê N.B. û H.U. ê ke nêweşîya înan ê kronîkî zî estî boydayîşî de tenganî ancenî. Sewbîna hepsîyo bi nameyê M.F.E. zî adirê bedenî zêde beno û kuxeno. Wina yeno şikkerdene ke nê hepsîyan de zî vîrus bibo. Heta nika testê nê 3 hepsîyan nêameyo kerdene.”

 

Gulserene daye zanayene ke xebera ke ê girewtî hema nêameya tesdîqkerdene û seba heme hepsîyan veng daye.

 

Hepsîyo ke ame îdîakerdene testê ci pozîtîf vejîyayo, demê çalakîyanê grevê vêşanîye ya ke Hemsereka Kongreya Komela Demokratîke (KCD) û Parlamentera Partîya Demokratîke ya Şaran (HDP) ya Colemergî Leyla Guvene semedê wedarnayîşê tecrîdê serê Rayberê PKKyî Abdullah Ocalanî daye destpêkerdene, 26ê kanûna 2018î de kewtbî grevê vêşanîye.