Gulîstan Azak

 

ENQERE- Parlamentera HDPyî ya Stenbolî Zuleyha Gulume, da zanayene ke paketa hukmî ya newe de semedê cinîyan ca nêameyo dayene û vat: "Bi pakete dir wazenê gumanbarê şîdet û tecawizî serbest bêrê veradayene. Gelo wexto ke nê camêrdî serbest bêrê veradayene, mekanîzmayê ke cinîyan paweno esto yan ney? Ney çin o! Îqtîdaro camêrd, zîhnîyetê camêrdî dewam keno."

 

Prosesê vîrusê koronayî de xeylêk welatê dinya de şîdetê serê cinîyan zî zêde bi. Tirkîya de zî her çiqas îzahatê fermî çinbi zî rêxistinê cinîyan dîyar kenê ke hedîseyê şîdetî de zêdebîyayîşêk cidî esto.

 

KCDP: Muracatî zêde bî

 

Platformê Ma Do Kiştişê Cinîyan Vindarnê (KCDP) dîyar kerd ke heme kesî semedê vîrusî kewtê keye û geyrayîşê seba xeta telefonî ya lezgînî zî zêde bîyê û vat: "Muracatê semedê platformê ma û rêxistinê cinîyan zêde bî. Muracatê semedê xetê 155,156 û 183 yê îstîmlakî zî zêde bî. Nê xetî zî qîm nêkenê. Wextê ke xo nêresnenê nê xetan, muracatê komelayan kenê.

 

Edlîye nêxebityenê: vernîya şîdetê serê cinîyan abeno

 

Parlamentera HDPyî ya Stenbolî Zuleyha Gulume da zanayene cayê ke tewr zêde cinî rastê şîdetî yenê keye yê û vat: "Ganî hukmat semedê cinîyan zemînêke asayîşî keye de awan bikero. La çi heyf verpayê ci qerarî yenê girewtene. Tu mekanîzmayêko cinîyan bipawo nîno vetene. Semedo ke edlîye nêxebityenê, rîsk hîna bîyo zêde. Nika Edlîyeya Çaglayanî de tena dadgeha nobedare ameya verdayene. Yê bîn nêxebityenê. Gelo do dadgeha nobedare şîdetê serê cinîyan senîn birecna. Ganî dadgehê cîya ya nobedare derheqê sucê vera cinîyan de biameyne verdayene. La nê çî bi ca nînê."

 

'Paketa hukmî cinîyan nêpawena'

 

Zuleyha tewr peyîn wina vat: "Bi na pakete dir do gumanbarê şîdet û tecawizî serbest bêrê veradayene. Gelo mekanîzmayê ke cinîyan do nê camêrdan ra bipawo esto yan ney? Pêameyîşê Stenbolî de yeno vatane, wexto ke kesê ke vera cinîyan suc kerdê, zîndanan ra vejîyê ganî vera înan tedbîr bêrê girewtene. Gelo vera nê sererastkerdişêk esto? Yan çin o? Paketa hukmî de semedê cinîyan tu çîyêk çin o. Coka cinî bi tehluke dir yenê rî bi rî. Nê prosesê vîrusî de vera ke tedbîr hemverê şîdetî bêro girewtene, verpayê ci qerar yenê girewtene. Tirkîya de tedbîrê ke cinîyan bipawê, nêameyê girewtene."