Fîlîz Zeyrek

 

MERSÎN - EDENE- Merdimê hepsîyê nêweşan dîyar kerdî ke ganî qanûnê efûyî bi hawayêko têduşt bêro bi caardene û vatî eke vîrus zîndanan de vila bibo û hepsî cuya xo vindî bikerê do AKP berpirsîyar bo. Rojgul Demîre pîyê ci 24 serrî yo tepişnayeyo, da zanayene ke ê tena têduştî wazenê.

 

Semedê vîrusê korona (Covîd-19) Tirkîya de tablo her ke şina giran bena, hûmara merdişan resa 700î û kesê ke testê înan pozîtîf vejîya, bi 30 hezarî. Yew cayê ke tewr zaf vera ci endîşe esto zîndanê. Qanûnê înfazî yê AKPyî de hepsîyê sîyasî ca nêgirewtî û merdimê hepsîyan reaksîyon ramojna û dîyar kerdî ke ganî têduştî bibo.

 

'No çîyo ke dewlete kena nîno qebulkerdene'

 

Dayîka hepsîyê bi nameyê Îsmaîl Kocamano ke zîndanê Asayîşê Berzî yê Tîpê F yê Boluyî de 5 serrî yo hepsîyo, Necla Kocamane endîşeyê xo ardî ziwan û vat: "Çutstandartî bi ca anê. Domanê bi merdişî dir yenê rî bi rî. Wareyêko 2-3 metreyî de hewl danê ke xo bipawê. Na nêtêduştîya dewlete bi tu hewa nîna qebulkerdene. No sucî merdimayî yo. Heqê ciwîyayîşî ûnîversal o. Gerek ma heqê hepsîyan bipawê. Ganî ma vengê xo bidê eşnawitiş. Ez sey dayîkêka wazena ke heqê hepsîyê sîyasî zî bêro dayene. Lajê mi grev de 5 mengî mendib. Problemê weşîye ciwîyeno. Çîyêk bêro sereyê domananê ma do AKP berpirsîyar bo. Di domanê lajê mi estê û domanê ci bi endîşeyê. Wazenê pîyê înan verê înan de bo. Ganî raya pêroyî bi hîsgêr bo û veng bidê zîndanan."

 

 ‘Divê mafê tenduristî û jiyana wan bikev bin ewlehiyê’

 

Waya hepsîyê bi nameyê Seyfettîn Baharo ke Zîndanê Tîpê F yê Boluyî de maneno û 28 serrî yo hepsîyo, Gulten Bahare zî dîyar kerde ke cîyayî kenê mabêne hepsîyan. Gultene ke eynî wextî de Hemsereka Yenîşehîrî ya Mersînî ya HDPyî ya, da zanayene ke AKP her çî de hemverê welatîyan cîyayî keno û vat: "Tedbîrê zîndanan xeylêk qels ê. Hepsî bi rîskê merdişî dir rî bi rî yê. Na rewşe, komelî kena mîyanê endîşeyan. Hewcedarîyê tewr lezabez  vernîgirewtişê vîrusî yo. Dewlete gerek heqê weşîye û cuye hepsîyan binê asayîşî. Birayê mi nêweşê Hepatît B yo. Lingê ci de varîs esto. Pişta ci de fitiq esto. Ma bi endîşeyînê. Ganî caardişêko têduşt bikerê."

 

'Domanîya ma destê ma ra girewtî'

 

Kênaya Yildirim Demîrî o ke 24 serrî hepsîyo û nika Zîndanê Tîpê F yê Boluyî de yo, Rojgul Demîre zî da zanayene ke hîrê serrî bîya, pîyê ci ameyo tepiştene û vat: "Domanîya ma ame diznayene. Xeylêk nêweşîyê ey yê kronîk estê. Di rey gonî kewte serê mîdeyê ci. Pişte û milê ci de fitiq esto. Doktorî Enqereyî de vat, eke emelîyat nêbo do felç bibo. Çimê ey rast se ra 90 ê çepî zî se ra 45 nêvîneno. Çimê xo ra emelîyat bi. Prostatî ci ra parçe ame girewtene. Rîşa merdimwere ra guman kenê. Roqelanê ci ra perçe ame girewtene.  Ma bendeyê netîceyê ci yê zî. Na rewşa vîrusî de pîyê mi nêeşkeno xo ver bido. Ma wazenê efû de têduştî bibo. Zîndanan de tedbîr qels ê. Pîyê mi vat, tedbîr nêameyê girewtene, sabun zî nêdanê înan. Awe germî nêdanê. Ganî pîyê mi û embazê ci serbest bêrê veradayene."