MÊRDÎN - Şukrîye Ergîne reaksîyon vera paketa vistişê înfazî yê bi sebebê vîrusê korona ameya amadekerdene û hepsîyê sîyasî tede ca nêgînê da û vat, wexto ke bi lajê xo dir telefon de qisey kerda 3 telefon ameyo birnayene û vat: "Werdê înan de herre vejîyena. Awe baş nêdanê. Wa domanê ma serbest bêrê veradayene."

 

Semedê vîrusê korona (Covîd-9) Tirkîya de 3in Paketa Hukmî ya ke ameya amadekerdene û hepsîyê sîyasî teberê nê de ameyî verdayene, pêvînayîşê înan Heyetê Pêroyî yê Meclîsî dewam keno. Merdimê hepsîyan û rêxistinê heqê merdiman, waştî ke ganî qanûnê înfazî de têduştî bibo û vatî hepsî bi rîskêko pîlî dir rî bi rî yê.

 

'Hîrê rey telefon ame birnayene'

 

Hepsîyo bi nameyê Mehmet Faruk Ergîno ke zîndanê Tîpê T yê Osmanîye de tepişnayeyo, pêvînayîşê bi telefonî keyeyê xo ra vat, 'tîya nêewnîyenê ma ra, werdê ma de herre vejîyena, avûkatanê ma bigeyrê' û coka zî hîrê rey telefonê ey ame birnayene. Dayîka Mehmetî, Şukrîye Ergîne wina vat: "Ma pêvînayîşê telefonî de çîyêk fam nêkerd. Di gardîyanî verê ci de vindertebî. Ma nêeşkenê domananê xo dir qisey bikerê. Na rewşe nîna qebulkerdene."

 

'Werdê înan de herre vejîyena'

 

Şukrîye  arde ziwan ke lajê ci wextê qedexeyê tebervejîyayîşê kuçeyan ê Nisêbînî de ameyo tepiştene û rastê cezaya muebetê giran ameyo û vat: "Osmanîye de her tewir îşkenceyê hepsîyan kenê.  Çop kenê werdê înan. Naylon û herre werdê înan de vejîyenê. Lajê mi xo ra nêweş o. Birînê ci estê."

 

'Ganî serbest bêrê veradayene'

 

Şukrîye da zanayene ke semedê tehlukeyê vîrusî ganî hepsî bêrê tahlîyekerdene û wina va: "Gelo do bi vîrus bikewê, do çîyêk bi ma nêbo? Do çîyêk bibo semedo ke ma dayîk ê. Çîyêk bêro sereyê lajê mi, ez o se bikerî? Awe baş nêdanê înan. Ma dayîkî wazenê ke domanê ma serbest bêrê veradayene."