Fîlîz Zeyrek

 

EDENE -  Aktîvîsta TJAyî Nur Aytemîre vat, çîyê ke prosesê vîrusî de yenê ciwîyene, polîtîkayê AKPyî de zelal yenê vînayene û vat: "Her babeta ke ma rexne kenê, ma benê muxalefet, la tespîtê ma pratîkê AKPyî de xo danê teber."

 

Tirkîya de semedê vîrusê korona 649 kesî cuya xo vindî kerdî û kesê ke testê înan pozîtîf vejîya zî seke 30 hezar û 217 ame eşkerakerdene. Tirkîya de heme welatî bi rîskî dir ameyî rî bi rî û nê prosesî de bi hezaran kesî bê kar mendî û pêwa nê zî hezaran kesî mecbûr mendî şorê kar. Veng yeno dayene ke welatî keyeyê xo de bê la yeno pawitene ke hewcedarî zî bi ca bêrê. Nê prosesî de reyna Tirkîya de çîyê girîng ameyî cuyayîş. Yewin îhaleyê Projeyê Kanal Stenbolî ame kerdene. Semedê 8 şaredarîyê HDPyî qeyûm ame tayînkerdene. 20 cinî hetê camêrdan ra ameyî qetilkerdene. Bi padayîşê mekteban dir perwerdeyê dûrî ame destpêkerdene û dîmenê daliqnayîşê mîyanê derse de veng da, rayîr vera reaksîyonê pîlan akerd. Reyna xebatkarê weşîye dîyar kerdî ke kêmîyê ekîpman û personelan yeno ciwîyayene.

 

'Her roje pratîkê AKPyî vejîyenê meydan'

 

Aktîvîsta Tevgerê Cinîyanê Azad (TJA) Nur Aytemîre, derheqê rewşe de wina vat: "Her babeta ke ma rexne kenê, ma vînenê muxalefetî, tespîtê ma, pratîkê AKPyî de xo dano teber. Keso ke nêweşxaneyê ci bi, bi wezîr. Sîstemê weşîye nêbi sîstemê başkerdişî, bi sîstemê kiştişî. Keso ke mektebê ci bî, bi wezîrê perwerdeyî. Roja yewin de daliqnayîş qalî kerdî. Ma nêzdîbîyayîşê îqtîdarî yê vera şîdetê cinîyan tespît kenê. Keyeyê parlamenterî de cinîyêke ameye qetilkerdene û xeylêk pratîkê bîn."

 

'Bi tayînkerdişê qeyûman îradeyê şarî çin hesibnayî'

 

Nure dewam de dîyar kerde ke polîtîkayê înkarî yê hemverê Kurdan dewam kenê û wina vat: "Raya pêroyî nê rê amade kerdî. Komelî de ewnîyayîşê 'her çî Kurdan rê yeno kerdene' empoze kerdî. Însanî mirenê la kes vengê xo nêvejeno. Cizîrî de bodruman de qirkerdişan kenê, qeyûman tayîn kenê, îradeyê şarî çin hesibnenê. Şewêke de bi hezaran kesî betal manenê. Gulîstan Dokuye nêgeyrenê, Kemal Kurkutî eşkenê bikşê. Zîhnîyetê vernîye ma zîhnîyetêko winasî yo."

 

'Polîtîkayê ke merdiman bidê ciwîyayîş çin o'

 

Nure wina vat: "Nê prosesî de her kes bi mergî dir ameyo rî bi rî. Polîtîkayêko dewlete yê merdiman bido ciwîyayîş çin o. Hûmara merdişan zêde bena. Qedexeyê tebervejîyayîşê kuçeyan nîno îlankerdene. Semedo ke ekonomîya welatî destûr nêdana ci. Sermayedarê girêdayeyê înan destûr nêdanê. Prosesê vîrusî de seba her kes keye de yo, şîdetê serê cinîyan zêde bi. Camêrdî hêzê xo dewlete ra gênê. Cinî nînê pawitene, nika teslîmê mergî ameyê kerden. Îqazkerdişê ke ma kenê, ganî verê çiman de bêrê girewtene."

 

'Ma bêçare nîyê, ma tena nîyê, ma bi rêxistinkerde yê'

 

Nure tewr peyîn qalîkerdişê xo de vat ke cinî pêwa pêro teda û astengîyan do têkoşînê xo dewam bikerê û wina qedêna: "Ganî îqtîdar bêvurîyo, vatişî bivuryê. Ganî hukmat veng bido cinîyan û şarî. Bi rojan o sazgehê cinîyan û ma îdarekarî rê pêşnîyaz kenê, tespîtan kenê û vengdayîşê wezîfe kenê. Ganî qanûnê hûmara 6284 bi hawayê tesîr bêro kerdene. Ma cinî bêçare nîyê, tena nîyê û ma rêxistinkerde yê."