WAN - Hemsereka TUHAY-DERî ya Wanî Kudret Temele dîyar kerde ke ganî ‘qanûnê efûyî’ de bi edalet têbigeyrê û vat: "Ma vînenê ke zîndanan de serewedaritiş vila beno. No serewedaritiş beno ke pêro zîndanan de vila bibo. Ganî pêro hepsîyê sîyasî serbest bêrê veradayene."

 

3in Paketa Hukmî ke seke qanûnê ‘efûyî’ yena zanayene, rojê vîyarte de bi îmzayê AKP-MHPyî Komîsyonê Edeletî yê Meclîsî de ame qebulkerdene. La hepsîyê sîyasî nê qanûnî de ca nêgirewtî. Reaksîyonî vera nê caardişî her ke şonê zêde benê.

 

‘Nêweşî cîyayî nêkena'

 

Hemsereka Komeleya Piştdayîşê bi Keyeyê Hepsîyan dir (TUHAY-DER) Kudret Temele, da zanayene ke qanûnê efûyî de eke sîyasîyan nêkerê ci bi adîl nîyo û vat: "Netîceyê ke hepsîyê nêweş bi vîrus bikewê do vindîbîyayeyê cidî virazîyê. Zîndanan de xizmetê weşîye xora bi sînor ê. Têkoşînê vera vîrusî de zî xeylêk qels o. Hewcedarîyê seke dezenfektan, lepik û maske nêameyê dayene. Merdimî nêeşkenê xo bipawê. Semedê şubeyî xeylêk kesî karê xo ra bî û nêeşkenê  hewcedarîyê hepsîyan bi ca bîyarê. Wa wezaretê dade wezîfeyê xo bi ca bîyaro û bi edalet têbigeyro. Na nêweşîye cîyayî nêkena."

 

'Koxuşe de 15-20 kes manenê'

 

Kudrete da zanayene ke her koxuşe de 15-20 kesî manenê û koxuşê nêweşan zî tewr tay 4 kes manenê û vat: "Derûdorê bê hewa seba hepsîyan hîjyenik nîyo. No bê wijdanî yo. Wa waştişê hepsîyan bi ca bîyarê."

 

'Tu heq nêdanê hepsîyê sîyasîyan'

 

Kudrete wina qiseykerdişê xo qedêna: "Hepsîyê sîyasî nêkerdê qanûnê efûyî. La kesê ke komê sucê bînan ra girewtî înan kenê mîyan. Merdişê zîndanan ra wezaretê weşîye berpirsîyar o. Wexto ke cenazeyê bêrê do wezaret çi cewab bido keyeyan. Tu heq nêdanê hepsîyê sîyasîyan. Bîyayîşê înan zî suc yeno vînayene. No yeno na mana ke terkê mergî ameyê kerdene. Ma vînenê ke zîndanan de serewedaritiş yenê ciwîyene. Eke wina şoro do pêro zîndanan de vila bibo."