MÊRDÎN - Hepsîya nêweşe Hasîbe Mengîrkaone ke wextê ke hemsereka DBPyî Mêrdînî bî ameye tepiştene û nika zîndanê Tîpê E yê Mêrdînî de ya, vera nêweşîya astim, şekir, tansîyonî têkoşîn kena û seba tehlukeyê vîrusî nêeşkena vejîyo revîr.

 

Seba vîrusê koronayî, rewşa zîndananê Tirkîya yena meraqkerdene û hema tu tahlîye nêameyê kerdene. Merdimê hepsîyan reaksîyon vera rewşe danê. Hemsereka DBPyî ya Mêrdînî Hasîbe Mengîrkaone (56) bi îdiaya ‘endamîya rêxistine’ ameybî tepiştene û menga Kanûne ra tepişnayeya. Hasîbe ke xeylêk nêweşîyê aye estê, zîndanê Tîpê E yê Mêrdînî de yena tepiştene. Verê vîrusî hîrê rey wedarnabî nêweşxane û xeylêk problemê aye seke şekir, astim û tansiyonî estê.

 

Waştişê veradayîşê bi kontrol ame redkerdene

 

Hasîbe ke her wext dermanan xebitnena û gerek biko revîr la nika vîrusî ra nêeşkena şêro revîr zî. Avûkatê aye seba serbest veradayîşê bi kontrolî muracat kerdî, la muracat amebi redkerdene.

 

'Hişê ma serê zîndanan de yo'

 

Mêrdeyê aye Alî Mengîrkaonî derheqê rewşa aye de zanayîş da ajansê ma û dîyar kerd ke semedê vîrusî hişê înan her wext serê zîndanî de yo û vat: "Ganîzîndanî bêrê vengkerdene. Cinîya mi nêweşa  astim û xeylêk nêweşîyê aye bîn estê. Tena aye ney, ganî pêro hepsî serbest bêrê veradayene. Vanê yê ke astimê înan esto wa nêvejîyê teber. O wext hepsî do se bikerê. Cinîya mi derman xebitnena xora. Wa înan bivînê."