Melîke Aydin

 

ÎZMÎR - Merdimê hepsîyan yê ke semedê Vîrusê Koronayî her ke şono endîşeyê înan zêde beno, dîyar kerdî ke eke çîyêko negatîf bibo, Wezaretê Dade berpirsîyar o û wina vatî: “Ma pîya têkoşîn bikerê û wa domanê ma nêmirê.”

 

Semedê Vîrusê Koronayî endîşeyê semedê yê ke zîndanan de yê zêde benê. Hepsîyê sîyasî vistişê infazî yê 3in Paketa Hukmî ra feyde nêgirewtî. Merdimê hepsîyan zî têduştî waştî û vatî: “Hacetê pakitî yê ke ganî belaş bêrê dayene, zîndanan da vay bîyê. Ganî şertê zîndanan verê çiman de bêro girewtene.”

 

‘Berpirsîyar wezaretê dade yo’

 

Dayîka hepsîyo ke zîndanê Tokatî de bi 4 serrî tepişnayeyo Şeymus Koç, Şukriye Koçe dîyar kerde ke lajê ci nîno tedawîkerdene û wina vat: "Îranî de 85 hezarî hepsî serbest ameyî veradayene. Tîya çira wina nêbeno? Derman nêdanê lajê mi û tedawî nêkenê. Ma mektubek derheqê nê de nuşt zî feyde nêkerd. Dest û sîneyê lajê mi de perçeyê şarapnelî esto. Lajê mi bi zatureye yo. Bi destê xo nêeşkeno binusno zî. Berpirs Wezaretê Dade yo."

 

‘Wa cenazeyî zîndanan ra nêvejîyê’

 

Kênaya hepsîyo bi nameyê Abdullah Ateş zîndanê girewteyê yê îzmîrî de yeno tepiştene, Sevgi Ateşe wina vat: “36 ceza dayî pîyê mi. Bi 17 serrî tepişnaye yo. Ez wazena pîyê mi zî feyde qanûno newe ra bigîro. Eke çîyêk bi pîyê mi bibo, berpirsîyar Wezaretê Dade yo. Wa cenazeyî zîndanan ra nêvejîyê.”

 

‘Ma nêwazenê kezaba ma biveşo’

 

Dayîka hepsîyê bi nameyê Mehmet Nezîr Gumuşo ke zîndanê Bandirmayê Balikesirî de yo, Hanîfe Gumuşe wina vat: “Lajê mi 20 serrî yo zîndan de yo. Semedo ke lajê mi kewtib grevê veşanîye coka hetê weşî ser o qels o. Koxuşêke de 20 kesî manenê. Eke bi virus bikewo, ê pêro do bikewê. Lajê mi vat, 'Tîya nêweşî çin a, la ezîyet zaf o.’ Dewlete 2 odayan semedê karantînayî pak kerdê. Hetê peydakerdişê hacetê pakitî de ma tengasî vînenê. Ma nêwazenê cenazeyî zîndanan ra vejîyê. Ma nêwazenê kezaba ma biveşo.”