MÊRDÎN - Şukrîye Dogane ya ke lajê aye zîndanê Tîpê T yê Hûmara 2 yê Îzmîrî de yo, dîyar kerde ke hewcedarîyê hepsîyan bi ca nînê û veng da ke hepsîyê sîyasî zî vistişê înfazî ra feyde bigîrê û vat, 'gelo bendeyê mergê înan ê.'

 

Seranserê dinya de vîrusê korona ra 40 hezarî ra zêdeyêr kesî cuya xo vindî kerd û Tirkîya de zî heta nika 214 kesî cuya xo vindî kerda. Dimayê virusî rewşa zîndnan ame rojeve û yew cayo tewr bi rîsk zî zîndanê. Hukmatî paketa hukmî de hepsîyê sîyasî nêdî û vera nê, merdimê hepsîyan reaksîyonê dewam kenê.

 

'Awe û sabun zî baş nêdanê'

 

Şukrîye Dogane dîyar kerde ke lajê aye Cengîz Dogan, zîndanê Tîpê T yê Hûmara 2yîn Îzmîrî de maneno û arde ziwan ke tu tedbîr nêameyê girewtene. Şukrîye derheqê pêvînayîşê telefonî yê ke lajê xo dir kerd wina vat: "Lajê mi vat, ‘rewşa ma baş nîya,  awe û sabun zî qîm nêkenê. Pereyê ma bibo zî nê çî çin ê.' Zîndanan tu tedbîrî çin ê. Gelo do xo senîn bipawê. Vera nê ganî tedbîr bêrê girewtene."

 

'Wazenê terkê mergî bikerê'

 

Şukrîye da zanayene ke ganî hepsîyê sîyasî zî lezabez serbest bêrê veradayene û qalîkerdişê xo wina qedêna: "Koxuşêke de 20 kesî est. Ma serekkomarî ra pers kenê. Gelo çira domanê ma serbest nînê veradayene? Bê suc tepişnayê. Nê vîrusî dir zî wazenê terkê mergî bikerê. Wa peynîya nê caardişan bîyarê. Vîrus vila beno do se bikerê. Tîya zî ma zulm ancenê, kezeba ma veşana."