WAN - Hepsîyê ke cezaya muebetî girewtê yê ke zîndananê cîya de manenê, bi telefon keyeyanê xo rê dîyar kenê ke tu tedbîrî nêameyê girewtene û werdî bê lapik û maske yenê viraştene. Merdimê hepsîyan zî endîşeyê xo ardî ziwan û vatî, eke çîyêk bibo do hesabê nê çî kam bido û ganî hepsîyê sîyasî serbest bêrê veradayene.

 

Zîndanan de hepsî bi tehdîdê vîrusê korona dir ameyî rî bi rî û xêrcê vejîyayîşê personelan tu tedbîr nêmaeyo girewtene û hepsîyê sîyasî tewrê paketa vistişê înfazî nêameyî kerdene. Hepsî, hewte ra di rey eşkenê pêvînayîşê bi telefonî bikerê û dîyar kerdî ke zîndanan de derheqê nê vîrusî de tu tedbîr nêameyê girewtene.

 

'Hucreyê yew kesî de hepsî nêeşkeno bêro pawitene'

 

Dayîka hepsî yê bi nameyê Lokman Aslanî ke cezaya muebetî ci rê ameya birnayene û 22 serrî yo hepsî yo û zîndanê Tîpê T yê Xarpêtî de yo, Hizir Aslane arde ziwan ke  Lokman her wext ameyo surgunkerdene û vat: "Lokman nika hîrê serrî yo zîndanê Tîpê T yê Xarpêtî de yo. Seba vîrusê korona kerdê hucreyê yew kesî. Bi no hewa vanê qey do bêrê pawitene. Ma wazenê ke qanûno efû seba hepsîyê sîyasî zî bo. Domanê ma semedê fikrê xo, cezaya muebetî girewtî. Peynîya hewteyî de ma bi telefon qisey kerd. Vat,  'werd bê lapik û maske' yeno viraştene."

 

'Gardîyanî semedê hepsîyan rîskêko pîl ê'

 

Hepsîyo bi nameyê Hekîm Aslanî zî cezaya muebetî ci rê ameya birnayene, 22 serrî yo hepsîyo û nika zîndanê Tîpê L yê Panosî de yo. Cinîya ci Hatîce Aslane vat ke Hekîm nêweşê ulserî yo û vat: “Rewşa mêrdeyê mi û hepsîyan baş nîyo. Gardîyan û werdê ke teber de yenê semedê înan rîskêko pîl o. Ganî hepsîyê sîyasî zî çarçewaya qanûnî de bê. Ma nê qebul nêkenê."

 

'Terkê mergî kerdê'

 

Alattîn Aslan zî zîndanê Tîpê L yê Umranîye ê Stenbolî de yo. Kênaya ci Berfîn Aslane vat, peynîya hewteyî de pîyê xo dir pêvînayîş kerdo û wina vatene xo qedêna: "Koxuşê 10 kesî de 20 kesî manenê. Tena kolonya dayê hepsîyan. Hepsîyê sîyasî terkê mergî ameyê kerdene. Asayîşê ganê pîyê mi û pêro hepsîyan çin o."