WAN - Atolyeya Kultur û Hunerê Aryenî, semedê vîrusê korona mabêne de xebatanê xo la bi telefon xo resnenê wendekaranê xo. Mamosteya muzîkî Fadîme Polate, veng da heme keyeyan ke seba ke domanê înan xebatê kulturî bikerê, wa piştdayîş bidê domananê xo.

 

Semedê vîrusê korona (Covîd-19) ciwîyayîş ame sewîyeya vindarnayîşî û Tirkîya de zî nê prosesî de xeylêk sazgehî mabêne dayî xebatanê xo. Merkezê Kultur û Hunerî yê Aryenî yê Wanî falîyetê înan estê mabêne dayî xebatê hunerî. La bi telefon xo resnenê wendekaranê xo.

 

'Ma têkilî de yê'

 

Mamosteya muzîkî Fadîme Polate dîyar kerde ke ê hunermendê Kurdan yê ameyoxî resnenê û wina vat: "No proses, serê pêro kesan de tesîr kerd. Ma mecbur mendî ke mabêne bidê xebat û dersanê xo. Ma bi telefonê xo wendekaranê xo geyrenê. Heta destê ma ra bêro, ma hewl danê ke xebatanê xo dewam bikerê. Dimayê nê prosesî ma do rayîrê xo de dewam bikerê."

 

'Ganî keyeyî piştdayîş bidê domananê xo'

 

Fadîmeye eynî wextî de bale ante serê wezîfeyê keyeyan nê prosesî de û vat: "Ganî pî û dayîkî rayîr bidê vernîya domananê xo. Ganî çîyê ke musnayî, bidê reynakerdene. Do wina karê ma hîna asan bo. Gerek piştdayîş bidê domananê xo. Ma xebatanê xo serê kultur û hunerî de kenê. Wendekarê ma xeylê xo doman ê. Ma emrê qij de wazenê ke vernîya asîmîlasyonî bigîrê."

 

'Ganî her keyeyî de kultur û huner bêro cuyayîş'

 

Fadîme tewr peyîn qalîkerdene xo de vat ke ganî keyeyî emrê qijî de vernîya asîmîlasyonî bigîrê û gerek her keyeyî de kultur û hune rbêro cuyayîş û bi taybet domanî teşwîqê ziwanê dayîke bêrê kerdene.