Gulîstan Azak

 

STENBOL- Parêzer Tuba Torune dîyar kerde ke çarçewaya ‘qanûnê efûyî’ de waştişê tahlîyeyan û vistişê ceza ya seba sucê vera cinîyan û îstîsmarê cinsî yeno waştene û vat, no zî do bibo sebebê şîdetê serê cinîyan û vat: "Prosesê şer, nêweşî û krîzê ekonomî de tewr zêde cinî hedef yenê girewtene û ganî cinî vera nê hêrişan amade bê."

 

Çarçewaya ‘paketa efûyî de’ yeno vatene ke xêrcê hepsîyê sîyasî û kesê ke qestî kiştê, do pêro hepsî seba tedbîrê vîrusî serbest bêrê veradayene.

 

Yanî pakete de pawitoxê heqê cinîyan, rojnameger û siyasetmedarî ca nêgînê. Kesê ke sucê cinsî kerdê zî yeno plankerdene ke serbest bêrê veradayene. Vera nê reaksîyonî her ke şênê zêde benê. 22 hezar kesê ke sucê cinsî ra tepişnayeyê, beşêkê înan pîl do efû ra feyde bigîro.

 

'Ma ameyê rewşa ke ma nêeşkenê qalê demokrasî bikerê'

 

Tubaye da zanayene ke do pakete dir sucê vera cinîyan û domanan zêde bibê û vat: "Welato ke qanunê efûyê derheqê îstîsmarê domanan de yeno munaqeşekerdene, ma vînenê ke şîdet senîn zêde beno. La bi paketa înfazî dir do şîdet tewr zêde bibo. Paketa ke ameya amadekerdene, şîdet meşrû kena û nêzdîbîyayîşê bêcezabîyayîşî zî vila kena. Gerek semedê na pakete hema ke nêbîya qanûn reaksîyon bêrê ramojnayene. Semedê nê rêxistinê cinîyan kampanyayan amade kenê. Xeylêk partîyan reaksîyonê xo ardî ziwan. Eke no welatî de hemverê nê caardişan bêvengî bibo, merdimî nêeşkenê qalê demokrasî û heqê merdiman bikerê."

 

'Wa hepsîyê sîyasî serbest bêrê veradayene'

 

Tubaye vat, pawitopxê heqê cinîyan, rojnameger, sîyasetmedarî teberê pakete de ameyê verdayene û vat seba sucdarê hêrişê zayendî zî tahlîye yeno plankerdene û vat: "Ma nê rast nêvînenê. Ganî cezaya seba kesê semedê fikr û fehmê xo ameyê tepiştene, newe ra verê çiman ra bêrê derbazkerdene. Xeylêk kesî seba sebebê sîyasî nika tepişnayeyê. Ganî ê bêrê tehlîyekerdene. Domanê ke dayîkanê xo dir tepişnayeyê, verê çiman de nêameyê girewtene. Na rewşe rastî de merdimî dejnena. Bi rastî zî ma fehm nêkerd ke bi na pakete wazenê se bikerê."