Şehrîban Abî

 

WAN - Sekretera Şubeyê Egîtîm Senî ya Wanî Funda Demîr Bozkurte dîyar kerde ke dîmenê awankerdişê yê perwerdeyî yê dûrî ke hetê MEBî ra ameyo dayene, do xeylêk problemê cidî xo dir bîyarê û vat: "Bername bi pedagojîk ney bi amancê sîyasî ameyo amadekerdene."

 

Semedo ke vîrusê korona Tirkîya de zî rî da, mektebî ameyî betalkerdene û wezîrê perwerdeyî Ziya Selçûkî eşkerayî da û vat, heta 30ê Adare do mektebî anêbê û nê prosesî de dûrî ra perwer de bêrê dayene. La dîmenê daliqnayîşê Adnan Menderesî û seretirakerdiş bername de ca girewtî û domanî nê sehneyan dir ameyî rî bi rî. Dimayê nê reaksîyonê bi şîdet ameyî ramojnayene. Sekretera Egîtîm Senî ya Wanî Funda Demîr Bozkurte zî babete ercna.

 

‘Bi amancê îdeolojîk têgeyrenê'

 

Fundaye derheqê babete wina qalî kerde: "Yeno hedefkerdene ke nêzdîbîyayîşê sîyasî hetê wendekaran ra bêro hezmkerdene. No nêzdîbîyayîş xora bîyo parçeyêko sîstemê perwerdeyî. Pêwa hende problem û û krîzî, amancê sîyasî yenê dewamkerdene. Rastî zî merdim şaş maneno."

 

'Do xeylêk probleman zî xo dir bîyaro'

 

Fundaye ard ziwan ke seba vîrusî xora domanî bi travmayî dir ameyî rî bi rî û vat: "Wextê wina zehmet de, nê vîdeoyê wina do travmayê ke yenê ciwîyene tewr giran bikero. Do xeylêk probleman zî xo dir bîyaro. Endîşeyê ma zaf ê. Nê sehneyan sey çîyêko normal ramojnenê. No bernameyêko pedaggojîk nîyo, bi amancê sîyasî ameyo amadekerdene."

 

Fundaye arde ziwan ke nê dîmenî do travma tewr zêde giran bikerê û do bibê sebebê zêdekerdişê sîdetî û vat: "No hem hetê komelî de hem zî şexsî de tabloyêko xof o. Hedefê ewil oyo ke nê prosesî de travma serê xo ra bierzê. Çi heyf nê çîyê ke yenê kerdene, krîz tewr giran keno. Reaksîyonê komelî çinbîyayîşê nê sehneyan bîyaro. Gerek her wext pêşnayîzê musnayoxan verê çiman de bêro girewtene."