Zeynep Durgut - Şehrîban Aslan 

 

AMED - Zîndanan de bi  hezaran rojnamegerî estê û bi tahlukeyêko pîl dir rî bi rî yê. Rojnamegerê ke semedê meslegdaranê xo yê hepsî kom bî, ‘Înîsîyatîfê Xebera To Ci Ra Esta' awa kerdî. Derheqê rojnamegerê hepsî de cinîyê rojnamgerî qisey kerdî û dîyar kerdî ke ganî rojnamegeran rê wareyê bi asayîş bêrê awankerdene.

 

Goreyê dayeyê peynî, heta nika seranserê dinya de bi hezaran kesî dir vîrusê koronayî tespît bîyo. Bi hezaran kesî zî dimayê ke vîrus înan de peyda bîyo, dermankerdişê înan ameyo kerdene û nê nêweşîye ra xelîsîyayê. Eynî wextî de semedê nê vîrusî bi hezaran kesî cuya xo vindî kerd. Tirkîya de zî hûmara kesê ke nê vîrusî ra cuya xo vindî kenê hûmara înan zêde bena. Tirkîya de tewr zêde zî hepsî bi tehdîdêko pîl nê vîrusî dir rî bi rî yê. Zîndanan de bi hezaran rojnamegerî estê û ê zî tehlukeyêko pîl dir rî bi rî yê. Rojnamegerê ke semedê meslegê xo yê hepsî kom bî, ‘Înîsîyatîfê Xebera To Esta' awan kerdî. Înîsîyatîfî, semedê xebata xo ya yewin game eşt û na çarçewa de serê medyaya komelî de dest bi kampanyaya kerd. Derheqê babete de rojnamegerê cinî qisey kerdî.

 

'Ganî ma hemverê pakêta hukmî bêveng nêmanê'

 

Verfaka Platformî Rojnamegerê Cinîyan ê Mezopotamyayî Ayşe Gûneye bale ante ser û vat: "Problemê Tirkîya sereyîn vernî girewtişê azadîya çapemenîye yo. Zîndanê Tirkîya bi seyan rojnamegerê hepsî estê. Nika babeta ma sereyîn rewşa hepsîyan a. Paketa hukmî ke hetê îqtîdarî ra seba hepsîyan ameya amadekerdene de hepsîyê sîyasîyan dir bi tu hawa ca nêameyo dayene û adîl nîyo. Bi nê pakête dir do kesê ke tacîz kerdê, tecawiz kerdê û kiştoxî do serbest bêrê veradayene. Ganî ma hemverê na pakate vengê xo berz bikerê. Nika seyan zêdeyêr rojnamegerî semedê raya pêroyî rastîyan xeberdar kerdê tepişnayeyê. Ganî bi lezabez sere de hepsîyê nêweş û dima ra zî pêro hepsîy sîyasî serbest bêrê veradayene. Wextê munaqeşekerdişî nêmend. Verê ke na nêweşîye zîndanan rê vila biba, gerek tedbîr bêrê girewtene.” 

 

'Ma wazenê bibê vengê rojnamegeran'

 

Ayşeye dewam de wina vat: "Ma seke platformê ke ci de rojnamegerêk ca gêno, ‘Însîyatîfê Xebera To Ci Ra Esta' awan kerd. Amancê awankerdişê nê Însîyatîfî tewr zêde rojevkerdişê embazanê ma yo. Ma zanê ke heta têkoşînêko bi rêxistin nêro kerdene, kes nêeşkeno heq biwazo. Ma nê tecrûbeyê xo de dî. Vera bêheqî ma rojnamegerî bî yew û ma qerar da însîyatîfêko bi no hawa awa bikerê."

 

'Ganî rojnamegeran rê wareyê asayîşî bêrê akerdene'

 

Ayşeye tewr peyîn dîyar kerde ke prosesêko winasî de weşîya rojnamegeran her çîyêk rê girîngtir o û wina vat: "Weşîya embazanê ma her çîyêk ra girîngtir a. Seba ke rojnamegerî bieşkê şarî rastîyan ra xeberdar bikerê. Lazimo ke bi îmkanê tewr bi asayîş de bixebitîyê. Proseêko wina da xeylêk xebatkarê ma keye de xebityenê. Bêgûman ma nêmusayî xebata keyeyî la weşîya endamanê ma her çî rê girîngtir a. Ganî bi lezabez rojnamegeran rê wareyanê bi asayîş awan bikerê û tedbîr bêrê girewtene."

 

'Ma rastîyan ra berpirsîyar ê' 

 

Hemsereka ‘Komeleya Rojnamegeran a Dîcle Firatî’  Dîcle Mûftûogluye zî da zanayene nê prosesî de berpirsyarîyê tewr zêde keweno serê milê rojnamegeran û wina vat: "Prosesê wina de tewr zêde cuya ma rojnamegeran xetere de ya. Semedo ke ma rastîyan berpirsyar ê û ganî bi xeberanê xo raya pêroyî xeberdar bikerê. Belê ma wayîrê kargehan nîyê ke ma vajê ma kargehê xo bigîrê şêrê keye de roşê. Ma nêeşkenê wina vajê. Ma şarî ra vanê, mevejîyê û ma do rastîyan neql bikerê. Nika xeylêk ma ra keye de xebityenê û xeylêk ma zî kuçeyan de pey xeberanê, tehdîdêko pîl dir rî bi rî yê û cuya înan xeter de ya."

 

'Ma xeberanê xo teyît kenê'

 

Dîcleye dewam de wina vat: "Wexto ke ma rewşa bîyaye ewnîyenê, ma baş vînenê ke  ma rewşêka awarte dir rî bi rî yê. Her şewe dimayê seatanê 12.00an  Wezaratê Weşîye eşkerayî dano çapemenîye. Xêrcê hûmara merdoxan û kesê ke bi nê vîrusî kewtê û merdê tu zanayîşêk cîya nîno dayene. Embazê ke ma nê ser o xeberan viraznenê, bi îdaya “Şarî tersnenê” yenê tepiştene. Nimtişê rastîyan nîno qebulkerdene. Coka ma tewr zêde xebityenê. Eke ma vizêr xeberêke di rey teyît kerda, ewro ma çar rey a xebere teyît kenê."

 

'Semedê xeberdarîyê rast bibê vengê embazanê ma' 

 

Dîcleye tewr peyîn wina vat: "Tirkîya bi îdarekarîyê xo ya îqtîdarî zîndanê tewr pîl a. Merdim eşkeno na paketa hukmî ya newe de bivîna. Ganî nê şert û mercan de embazê ma lezabez serbest bêrê veradayene. La tena rojnamegerê hepsî ney, eynî wextî de hepsîyê sîyasî zî serbest bêrê veradayene. Ma veng danê herkesî ke û vanê, eke şima wazenê rastîyan ra xeberdar bê, ganî şima bibê vengê embazanê ma."