AMED - Parlementera HDPyî ya verê Çaglar Demîrela ke Zîndanê Tîpê F yê Hûmara 1î Kandirayî de manena, veng da û waşt bi lezabez hepsîyê nêweş û emrê înan pîl ê serbest bêrê veradayene. Çagla, da zanayene ke zîndanan de tedbîr nînê girewtene.

 

Parlementera Partîya Demokratîkî ya Şaran (HDP) ya verê Çaglar Demîrele bi rayîrê keyeyê xo zîndan ra veng da. Dayîka Parlementera HDPyî ya verê ya Amedî Çaglar Demîrele ke zîndanê Tîpê F yê Hûmara 1in Kandirayî de tepişnayeya Gulperî Demîrele, dîyar kerde ke vizêr bi rayîrê telefonî kêna xo dir qisey kerde.

 

Çaglar Demîrele bi rayîrê keyeyî nê zanayîş da: "Hetê pakîtî ra tu vurnayîşêk nêameyo kerdene û sey verê dewam kenê. Semedê tedbîrê vîrusê coronayî zî tu malzemeyê pakîtî nêameyê dayene. Zîndan de tu tedbîrê taybet nêameyê girewtene. Semedo ke zîndanê Kandirayî de tu testê vîrûsî nêkerdê, hepsî bi tehlukeyêko pîl dir rî bi rî yê. Coka hepsîyê nêweş û yê ke emrê înan pîl o lezabez serbest bêrê veradeyene.”

 

Dayîka Çaglare, Gulperî Demîrele, da zanayene ke seke keyeyî serê rewşa zîndan de bi endîşeyê û vat: "Gerek bê cîya pêro hepsî serbest bêrê veradayene."