AMED - MED-TUHAD-FED û OHDyî derheqê 12 zîndanan de rapor amade kerd û pare kerd ke maske, lapik û dezenfektanî nêdanê tepişteyan.

 

Avûkatanê Komeleya Huqûqnasan ê seba Azadîye (OHD) û Federasyonê Komeleyanê Paştdayîşî û Huqûqî yê Keyeyanê Tepişteyan û Hukmwerdeyan ê Medî (MED-TUHAD FED) 12 zîndanan zîyaret kerdî û derheqê çimdarîyanê xo de raporêk amade kerd.

 

Avûkatan 12 zîndanê Amedî, Dîlokî, Xarpêtî, Agirî û Erziromî zîyaret kerdî û da zanayene ke nê zîndanî binê rîskêkê pîlî de yê.

 

Goreyê raporî Zîndanê Xarpêtî de ame dîyene ke lepik û maskeyî nêameyî dayene tepişteyan labelê personelan de estbî. Tepişteyan dezenfektanî waştî la îdareyê zîndanî no waştiş red kerd. Zîndanê Amedî de zî lapik û maskeyî nêameyî dayene tepişteyan. Zîndanê Dîlokî de zî gardîyan û leşkerî pê koman gêrenê, personelî maske û lapikî nêxebitnenê, korîdar û odayî zî nênê dezenfektekerdiş.

 

Rapor de ame vatene ke Zîndanê Oltu yê Erziromî de karê dezenfekteyî ame kerdene.Avûkatan eşkera kerd ke Zîndanê Wanî û Zîndanê Patnosî yê Agirî de zî dezenfektan, maske, lapikî û hacetê pakîye nêameyî dayene tepişteyan; awe, ceyran û werde zî bi hawayêkê qîmî nênê dayene.

 

Eynî wextî de rapor de veng dîya selahîyetdaran ke qanûno infazo newe seba heme hepsî û hukmwerdoxan zî bêro kerdene û hepsî serbest bêrê veradayene.