Gulîstan Azak

 

STENBOL - Hepsî Ekîm Polatî vera îhlalkerdişê heqan 45 rojî kewt grevê vêşanîye û nêweşê qelb, helyayîşê este û KOAHyî yo. Maya ey Songul Îlkere dîyar kerde ke ganî hukmat vera tehdîdê vîrusê korona hepsîyan tehlîye bikero.

 

Goreyê dayeyê ke wezîrê weşîye Fahrettîn Koca eşkera kerd hûmara tespîtê vîrusê korona hezar derbaz kerdo û hûmara kesê ke cuya xo vindî kenê roj bi roje zêde benê. Yew cayê ke bi rîsk zî zindanê. Zindanan de îhlalkerdişê heqan bi vîrusê korona dir zêde bi û çalakîyê hepsîyan ê vera îhlalkerdişê heqan dewam keno. Pêwa waştişê keyeyan, pawitoxê heqê merduman û hepsîyan hema cewabêko seba çareserî nêameyo dayene. Rewşa hepsîyê nêweşan, kal û pîr û yê ke grevê vêşanî de yê tewr krîtîk o.

 

Goreyê raporê ÎHDyî 2019ine de 458 ci ra giran bi pêroyî hezar û 334 hepsîyê nêweş estê. Goreyê Însîyatîfê Heqan zî hûmara domanê ke bi mayanê xo dir zindan de manenê, teşrîna peyêne 2019ine heta nika resaya 780î.

 

Grevê vêşanîye dewam kenê 

 

Endamê Grup Yorumî Helîn Bolek û Îbrahîm Gokçekî bi amancê ke falîyetê xo yê hunerî bi hawayêko azad bikerê, kewtibî grevê vêşanîye û dima ra çalakî açarnabî rojeyê mergî. Îbrahîm Gokçek roja 279in rojeyê mergî û Helîn Boleke zî roja 276ine de ya.

 

Hepsîyo bi nameyê Mustafa Koçak ke seba kiştişê dozger Mehmet Selîm Kirazî ameyne hukmkerdene û 11ê Temmuza 2019ine de cezayê muebetê giran ci rê amebi birnayene û zindanê Tîpê T yê Hûmara 2yîn Şakranî de maneno, bi amancê ‘hukmkerdenêko adîlane’ dest bi grevê vêşanîye kerdib û açernabi rojeyê mergî. Rojê 254ine de bi îşkence mudaxaleyê ci amebi kerdene û nika roja 267ine de yo.

 

Ekîm Polato 23 serre zî zindanê Tîpê T yê Akhîsarê Manîsayî ra yo û o zî 45 roj çalakîya grevê vêşanîye kerd. Ekîm 2016 de Stenbol de amebi tepiştene û hetê dadgehe ra bi sûcdarîyê 'endamîya rêxistine’ amebi tepiştene. Maya ci Songul Îlkere derheqê rewşa lajê xo de zanayîş da.

 

'Dimayê grevî derman dayê ci'

 

Songul Îlkere da zanayîş ke semedê vîrusê korona cuya hepsîyan binê tehluke de ya û vat: "Lajê mi zindanê Bandirmayî de bi merg ame tehdîdkerdene. Dima ra zî surgunê zindanê Tîpê T yê Akhîsarî yê Manîsa ame kerdene. Îhlalkerdişê heqan yê resayî heta tacîzî uca zî dewam kerdî û hema zî dewam kenê. Cigêrayîş, qedexeyê waştişnameyan, sînorkerdişê pêvînayîşê bi avûkatan dir û qedexekerdişê neqlkerdiş. Lajê mi nêweşîyê qelb, koah û helnayîşê esteyî yo. La dermanê ci dimayê çalakîya grevê vêşanîye ameyî dayene. Zindan de vatî, 'kantîn de seba to nîno dayene' û xeylêk rey nêeşkabi hewcedarîyê xo uca de bigîro. Nika zî semedê korona pêvînayîşî ameyî qedexekerdene. Rîskê ke lajê mi felç bibo û bi rîşa merdimwere bikewo zêde yo. Lajê mi semedê îfadeyê bê bingeyî nika tepişnayeyo. Ganî bilez bêro tahlîyekerdene."

 

'Semedê tehlîye şima çi pawenê' 

 

Songule tewr peyîn qiseykerdişê xo de veng da rêxistinê weşîye û huqûqî, parlamenteran kerdî ke heyetan bieşrawê zindanan û eynî wextî de semedê hukmatî zî persa 'seba tehlîye şima çi pawenê?' kerd.