Medîne Mamedoglu

 

MÊRDÎN - Şaristano Antîk yê Dara ke bi mîmarî û tarîxê xo xeylêk namdar o, binê herre de bendeyê kifşkerdişî yo. Semedo ke butçeyêko nîno visnayene, şaristan kolnayîşê rê nîno akerdene û sirê xo yê hezar serran hema paweno.

 

Şaristano Antîk yê Dara ke bi tarîxê xo û mîmarîyê xo merdiman heyran verdeno, verê ke restorasyonêko û newebîyayîşêko bêro kerdene, kûrîyê tarîx de yeno hepskerdene. Şaristano antîk ke bi xebatê kolnayîşê yê peynî de ame rojeve, dimayê xebate çîyêko nêame kerdene. Şaristano Antîk yê Dara serra 500 de hetê Romayan ra vera Sasanîyan ra ameyo viraştane û dima ra zî sey gor ameyo xebitnayene û bi serran verê ameyo kifşkerdene û binê dewe de mendo. Bi sebebê ke butçeyêko baş çin o, xebate zî nînê kerdene.

 

Şaristano antîk wareyêko 12 kîlometreyî binê herre de yo û dorê ci bi têlan ameyo pawitene. Nîmeyê Dara hema nêameyo vetene. Dewa ke bi zindan, şikeft û goristanan xeylêk dewlemenda, sey wareyê sît ê sewîyeya yewin fînayî binê pawitişî.

 

Şaristano antîk taxa Oguzî de yo û 20 kîlometre Mêrdîn û Nisêbîn ra dûrî yo. Dorê ci bi têlan ameyo padayene. Beşêko pîl ê dewe ameyo kolnayîş û xeylêk hema binê herre de yo.

 

‘Butçeyo bi serran nêameyo visnayîş wa bêro visnayene’

 

Dewijan diyar kerdî rewşa ke tarîx pêro vejîyo meydan do Dara eleqeyêko pîl bivîno û vatî: “Butçe nêdenê. Semedo ke wareyê sîtî yo çîyêk nêkenê. Çend serrî yo ne restorasyon ne zî kolnayîşêk ameyo kerdene. Wina verdayî. Bi kîlometre wareyo ke nêameyo kolnayîş esto. Kam zano zereyê înan de çi esto. Xeylêk bi erj ê. Ma nêwazenê wina bimano.”

 

Heto bîn ra bi ameyîşê wisarî dir turîstî seba cayê ke ameyê vetene, serdayîşê xo bi ca bîyarê. Hetê turîstê herêmî û xerîban ra eleqeyêko pîl vîneno.