AMED- Çermûgê Amedî de babîyo extîyar û kênaya ci ya digane rîyê hedîseyêkê  weçînayîşê 31ê adar a 2019î ra ameyî kiştene.

 

Taxa Xelîkanî ya qezaya Çermûgî ya Amedî de weçînayîşê herêmî yê 31ê adar a 2019î de seba keyayîye pêrodayîşêk vejîyabi û keyeyê Selahattin Ozkahramanî dewe ra vejîyabi. Selahattîno ke serrêke ra dima badê pêkerdişî agêra taxe pîya bi kênaya xo ya digane ame kiştene.

 

Goreyê zanayîşanê ke ameyî girewtene weçînayîş de  2 dezayî semedê keyayîye bîye namzed û her diyan zî dezayê xo Selahattîn Ozkahramanî (65)  ra raye waşte. Seba ke her di namzedî zî dezayê ci yê Selahattînî reya xo nêşuxulanye. E.Y. yo ke ke weçînayîş vînî kerd pîya bi di kesan hêrişê keyeyê lajê Selahattînî Ramazan Ozkahramanî kerd û o birîndar kerd. Badê ci pêrodayîşê mabênê her di keyeyan bi derg. Keyeyê Selahattînî rîyê pêrodayîşî ra bar ked şi Mersîn. 

 

Taxa ke peyser ageyra de ame kiştene

 

Dima ra keyeyan pêkerd û goreyê naye veyve, tazîye û semedê zîyaretkerdişê hêgayanê xo keyeyê Selahattînî eşkeno agêro taxa xo. Badê serrêke keye şi taxe. 17ê adare de hela ke Selahattîn pîya bi cinî û kênaya xo ya digane hêga ra agêrayêne keye dezayê ci  E.Y. û panc kesanê bînan bi çekan hêrişê înan kerd. Hêrişê de Selahattîn û kênaya ci Surîye Ozkahraman a digane û wayîrê 3 doman cuya xo vindî kerdî û cinîya ci Guzele Ozkahraman zî birîndar bîyî.