ENQERE - Wekîlê Sereka Koma HDPyî ya Meral Daniş Beştaşe, semedê tedbîrê zindanan vera vîrûsê korona bêrê girewtene pêşnîyazê qanûnê meclîsî da û vat: "Zindanan de hûmara hepsîyê nêweşan zêde beno û tu tedbîr û vurnayîş nînê kerdene.

 

Wekîlê Sereka Koma Partîya Demokratîkî ya Şaran (HDP) Meral Daniş Beştaşe, vera vîrûsê korona (Kovid-19) û tedbîrê zindanan bêrê girewtene, pêşnîyazê qanûnî da meclîs û waşt bi qanûnan tedbîr bêrê girewtene. Merale, sebebêwaştişî de ard ziwan ke zindanan de hûmara hepsîyê nêweşan zêde bena û semedê nê tu tedbîr û vurnayîşî nînê kerdene û çareserî nînê kerdene. 

 

Merale, da zanayene ke semedê tedbîran game nêameya eştene û problemî nêameyî çareserkerdene û wina vat: "Bi vilabîyayîşê vîrûsê korona, zindanan de rîsk tewr zêde bîyo. Nika bi seyan hepsîyê nêweş, mîyanê  şert û mercê pak de nêeşkenê biciwîyê. Reyna bi qasê ke yeno waştiş û hewcedarîyê werd û zexîreyan nêdanê hepsîyan. Nika tu tedbîr nêameyê girewtene. Tedbîrê ke ameyê girewtene zî tena zîyaretê keyeyan qedexe kerdê. Nika nîno zanayene ke na nêweşî resaya zindanan yan nê. Semedê nê ganî vernê de koma hepsîyê ke binê rîskî de yê serbest bêrê veradayîş. Eke no nêro kerdene de merdişê komî bi xo dir bîyaro. Semedê nê ganî bi lez hepsîyê nêweşî serbest bêrê veradayene. Ganî şert û mercê weşîye tewr zêde bêrê başkerdene."

 

Merale, pêşnîyazê qanûnî da meclîs û waşt ke goreyê talûkeyê û rîskê vîrûsî tedbîr bêrê girewtene û qanûn bêrê rastkerdene.