Rengîn Azîzoglu

 

AMED - Rojnamegerê cinî tedayê hemverê rojnamegeran ercnayî û dîyar kerdî ke hewl yeno dayene ke mesajê, ‘bêveng bê, qisey mekerê û rastîyan menusê' bidê rojnamegeran. Rojnamegerê cinî dîyar kerdî ke do xebatkarê çapemenîya azade qetî nuştişê rastîyan ra tawîz nêdê.

 

Tedayê hemverê rojnamegeran roj bi roje zêde benê. 1ê Adare de rojnameger Alptekîn Dursunoglu û dimayê ci muxabirê Rudaw TV Rawîn Stêrk bi sebebê parekerdişanê serê medyaya komelî ameyî destbendkerdene û tepiştene. Eynî wextî de OdaTv de 3ê Adare de xebera bi serê nameyê ‘dîmenê cezaneya endamê MÎTî yê Lîbyayî ke bêveng ame definkerdene resa Odatv’ ame weşaneyene û semedê nê Mudûrê Xeberan yê Oda Tv Bariş Terkoglu, muxabir Hulya Kilinç û Bariş Pehlîvan ameyî destbendkerdene. Reyna seba na xebere rojnameyê Yenî Yaşamî ra Ferhat Çelîk, Midûrê Karê Nuştişî Aydin Keser û nuştoxê Rojnameyê Yenîçag Murat Agirel ameyî destbendkerdene. Derheqê babete de muxabira Arti Tv ya Amedî Bahar Kiliçgedîke, rojnameger Nişmiye Gulere û muxabira Ajansê Mezopotamyayî (MA) Arjîn Dîlek Oncele ercnayî.

 

'Mesajê 'rastîyan menusê' danê'

 

Muxabira Arti Tv ya Amedî Bahar Kiliçgedîke dîyar kerde ke rojnamegerî wextêko derg o hedef de yê û wina vat: "Îqtîdaro sîyasî, semedê xeberê ke yenê viraştene û heqîqet ra tersenê û nêrehet benê û wazenê rastîyan raya pêroyî ra nimnenê. Tepiştişê rojnamegeran bi pêroyî bi amancê vernîgirewtişê falîyetê rojnamegerî yenê kerdene. Mesajê, ‘bêveng bê, qisey mekerê, rastîyan menusê' danê rojnamegeran. Bi no hewa, rojnamegeran tehdîd kenê. Şexsê rojnamegeran de mesajê, ‘şima qisey bikerê, şîma rexne bikerê do eynî çî bêro sereyê şima zî' danê komelî."

 

'Ma do vengê heqîqetî bidê eşnawitişî' 

 

Bahare dewam de va ke sansurê Fox Tv yê derheqê rojanemgerê Yenî Yaşamî de ercna û wina vat: "Nêzdîbîyayîşê çapemenîya hetgir yê hemverê çapemenîya muxalîfî dîyar a. La sazgehêko sey Fox ke xo sey muxalîf bi name keno, bi taybet xebatkarê Rojnameyê Yenî Yaşamî nêvîneno û no zî nêzdîbîyayîşê înan hemverê çapemenîya muxalîf û Kurdî ramojneno. Derheqê rojnamegerê Kurd de hema hema tu xeberî nêameyî vitraştene. Heyf ke sazgehê weşanê yê teberê çapemenîya muxalîf, bi polîtîkayê netewperest tê geyrenê. Pêwa heme tedayan do rojnamegerî bêveng nêmanê. Ma do her wext rastîyan raya pêroyî rê neql bikerê. Ma do vengê heqîqetî her wext bidê eşnawitiş."

 

'Teda zêde bî'

 

Rojnameger Nişmiye Gulere zî vat, seranserê îqtîdarê AKPyî de muxalîf hedef ameyê girewtene û heto bîn ra zî rojnamegerê ke rastîyan neql kenê, hedef yenê girewtene. Nişmîye wina vat: "dimayê hewldayîşê 15 Temuze dima bi KHKyê ameyî vetene, 116 sazgehê çapemenîye ameyî padayene û xeylêk rojnamegerî ameyî destbendkerdene û tepiştene. Dimayê hewldayîşê derbayî ra OHAL amebi îlankerdene. Her çiqas ame vatene ameyo wedarnayene zî tedayê hemverê rojnamegeran kêm nêbî. Verpayê ci zêde bî. Nimûne, nê rojan de tepiştişê 8 rojnamegeran. Rojnamegerîsemedê falîyetanê xo sucdar ameyî hesibnayene û ameyî tepiştiş. Rojnamegerê ke rastîyan nusnenê, yenê tepiştene."

 

'Rojnamegerî do peyser game nêerzê'

 

Nişmîyeye tewr peyîn wina vat: "Semedê rojnamegeran îqtîdaro A yan zî B girîng nîyo. Se beno wa bibo, qelemaya ke rastîyan nusnena, do qetî nêkewo erd. Ma her rey vanê ke çapemenîya azad nêeşkena bêra bêvengkerdene. No slogan yan zî propaganda nîyo. Ma na babete de vatişê xo bi ca anê û meslegê xo îcra kenê. Ma do wina zî dewam bikerê. Pêwa heme hêrişan do tu çîyêk bi ma peyser game nêdo eştişî. Ma bi tepiştişê rojnamegeran nêtersenê."

 

'Ma xebatanê xo dewam kenê' 

 

Muxabira Ajansê Mezopotamya (MA) Arjîn Dîlek Oncele zî da zanayene ke heme rojnamegerê ke ameyê tepiştene, xebatkarê çapemenîya azad ê û wina vat: "Her çiqas çapemenîya hetgir, xebatkarê çapemenîya azad nêvînê zî ma do vernê de înan bîyarê xo vîr. Embazê ma her roje kuçeyan de rastê GBTyan yenê û yenê destbendkerdene. Embazê ma serbest bêrê veradayene zî nîno manaya ke azad bîyê. Bi heme hêzê xo verê xo danê xebatanê înan. Qerarê derheqê embazanê ma de ameyê dayene, qerarê sîyasî yê. Rojevê ma de şer, krîzê ekonomî û vîrusê korona esto. Heto bîn ra hêrişê hemverê Lîbyayî dewam kenê û pêrodayîşê Vakur û Rojhelatê Sûrîye estê. Wazenê munaqeşeyê ke uca de estê binimnê û vindîkerdişî nêrê zanayene, nêrê vînayene. Coka zî hewl danê çapemenîya azad bêveng bikerê. Pêwa heme polîtîkayê înan xebatkarê çapemenîya azad rastîyan binusnê. Hûmara ma roj bi roje zêde bena. Xeylêk embazê ma estê. Embazê ma ke zindanan de xeberan nusnenê estê. Ma mesajê înan gênê û hemverê nê xebatê xo dewam kenê."