MÊRDÎN - Kesê ke qedexeyêtebervejîyayîşê kuçeyan de cuya xo vindî kerdî û şaristanê cîya goristanê bêkesan de ameyî definkerdene, keyeyan seba cenazeyanê xo bigîrê têkoşîn bikerê. Latîfe Akyuze ya semedê cenazeya tornê xo û birayê xo yê Rihayî de ameyî definkerdene, hewl dana bîyara Nisêbîn, dîyar kerde ke semedê qedexeyan nêeşkenê bîyarê û pêwa serdayîşê nêeşkenê cenazeyan bîyarê.

 

Qezaya Nisêbînî ya Mêrdînî dimayê îlankerdene îdarekarê xoser ra dima 5 rey qedexeyê tebervejîyayîşê kuçeyan heta adara 2016î dewam kerd, ame îlankerdene. 14ê adara 2016ine de qedexeyê tewr derg ê qeza dest pêkerd û 134 rojan dewam kerd. Cenazeyê kesan ê ke pêrodayîşan de cuya xo vindî kerdî sey şaristananê Mêrdîn, Riha, Dîlok û Meletî goristanê bêkesan de ameyî definkerdene. Pêwa ke nasnameyê hîn cenazeyan ame tespîtkerdene zî keyeyî nêeşkenê cenazeyan bîyarê şaristanê xo.

 

Qedexeyê goristanê

 

Xeylêk keyeyî seba cenazeyê xo bigîrê, muracatê Serdozgerîya Komara ya Mêrdînî dayî û nimûneyê gonî dayî. La heta nika 10 cenaze teslîmê keyeyan ameyî kerdene. Nêzdîyê 70 cenaze hîna nêameyî teslîmkerdene. Ame dîyar kerdene ke çend keyeyê ke nimûneyê DNAyî înan pê girewto zî cenaze nêgirewtê. Keyeyî dîyar kerdî ke Qeymeqamtîyê Nisêbînî hetê, ‘Cenazeyê PKKyî nêrê definkerdene’ qerar dayê û nêverdenê goristanê Hacecî bêrê definkerdene.

 

‘Pêwa serdayîşî nînê teslîmkerdene’

 

Latîfe Akyuze dîyar kerde ke pêwa nasnameyê tornê ci Mehmet û birazîyê ci Îbrahîm ameyo tespîtkerdene zî hema cenazeyê xo nêardê û wina vat: “Her di zî qedexeyê peynî zere de mend. Îbrahîm taxa Zeynel Abîdîn û Mehmet zî taxa Abdulkadîrpaşa cuya xo vindî kerdî. Dimayê pêrodayîşan bi mengan ma nêzanayîne ke cenaze berdê ça. 6 mengî dima Mehmet û serrêka dima zî ma Îbrahîm dî. Her di zî goristanê bêkesan ê Rihayî de yê. Ma cenazeya her diyan zî nêeşkayne bigirewtêne. Pêwa waştişnameyan teslîmê ma nêkerdî.”

 

‘Ma nêeşkenê şêrê serdayîşê goristanan zî’

 

Latîfeye wina qedêna: “4 serrî yo ma nêeşkenê şêrê serdayîşê goran zî. Eke ma şêrê do vajê şima ameyî şêrê bigîrê. Ma se bikerê. Gelo ma cenazeyan bigîrê serê milê xo. Ma wazenê cayê ke wazenê bêrê definkerdene. Xora çar esteyî mendê. Înan esteyan ra zî tersenê. Nêzanê se bikerê. Erdogan çi ma ra wazeno. No dişmanîyê çiyo. Êdî bes o.”