AMED - Kurdan Amed de startê Newroze da. Venga kurdan ame dayene ke wa bi ruhê yewîya neteweyîye tewrê Newroze bibê.

 

Amed  de bi beşdarîya hemserekan, hemvervatoxan û temsîlaranê partî û têgêrayîşanê kurdan startê fîrazşayîya Newroza 2020î bi kombîyayîşêkê çapemenîye ame kerdene. Kombîyayîş bi beşdarîya Hemserekanê Kongreya Komelê Demokratîkî (KDC), Hemserekanê Partîya Herêmanê Demokratîkan (DBP), hemserekanê Pêroyînan ê HDPyî, Hemvervatoxanê Kongreya Demokratîke ya Şaran (HDK) Vervatoxa Têgêrayîşê Cinîyan ê Azadan (TJA) Serekê Pêroyî yê Partîya Azadîye, temsîlkaranê Komeleya Şorişgêran ê Demokratîkan a Kurdan (DDKD), Serekê Pêroyî yê Partîya Merdimî û Azadîye (PÎA), Serekê Pêroyî yê Partîya Komunîste ya Kurdan (KKP), Temsîlkarê Platformê Demokratanê Kurdîstanî yê Vakurî (PDK-Vakur) û wekîlanê HDPyî ame kerdene û startê Newroze ame dayene. Kombîyayîş Otêla Demîrî ya Sûrî ya Amedî de ame kerdene û pankartê ''Bi Ruhê Newroze Yewîya Neteweyîye'' û ''Seba Azadîye, Yewîye û Demokrasî Bêrê Newroze'' ameyî daliqnayene.

 

Kombîyayîş de eşkerayîya hempare ya bi tirkî û kurdkî ameye wendene. 

 

Eşkerayîya hempare ya Yewîye wina ya:

 

''Şarê kurdî bi hezaran serran o ke seba pîlkerdişê xoverdayîşî her serre 21ê adare de na roje sey roşanî, ganîbîyayîşî, xoverdayîşî û hêvî fîraz keno. Adirê Newroze seba kurdan bi sembolê xoverdayîşî û pakîye.  

 

Şarê kurdî emser zî vera zulmî, înkatî, îmha, asîmîlasyonî û tepiştişî do bibo vengê haştîye, biratîye, azadîye û têdûştîye û bivejîyo meydanan. Seba cuyêka senîne?  Şarê kurdî reyna waştişanê xo bi adirê Newroze geş bikerê. Ma emser zî binê versîya şerî, xizanîye û bêçareserîye de Newroz fîraz bikerê. Bi ruhê Newroze vera şerî, bêedaletî û polîtîkayanê înkarî vatişê ma esto. 

 

Newroze de; ma bimojnê ke waştişê sîyasî yê şarê kurdî babeta bazarîye ya hêzanê şerî nîya. Seba awankerdişê cuya haştîyane, rûmetêne, têdûşte û azade ma do pêro waranê cuye de xo rêxistin bikerê. Ma cuya axatîye û koletîye ya ke ma rê yena waştene qet qebul nêkenê.  Bi nê wesîle ma do venga pêro rayaumûmîye ya mîyanneteweyîye û dostanê xo bidê. Seba haştîya Rojhelatê Mîyanênî ma do venga pêro dinya bidê ke vera şeranê hegemonan vengê xo berz bikerê. 

 

Ma do seba nêheqî û bêhuqûqîyan ê vera tepişteyan, seba Birêz Abdullah Ocalanî, seba tepişteyanê nêweşan û seba pêro tepişteyanê sîyasîyan biqerê vajê azadîye. Ma do sey cinî, ciwan û kokiman seba waştişanê cinîyan ê azadîye û cuya hempare ke bi xoverdayîşê xo hêz danê ma û xoverdayîşî biqerê. Ma do vera sermayekerdişê awe, çem, daristan û şaristananê xo, ma do vera rijnayîş û taxrîbatê xozayê xo wurzê payan ser. Ma do seba ke verê sîyasetê demokratîkî abibo, îdareyêko têdûşt awan bibo biqerê.

 

Newroza 2020î biba platformêk ke şarê kurdî tede bi coşî û kelecanêkê pîlî waştişanê xo yê sîyasîyan biqero. Ma sere de şarê xo pêrp dostanê xo, rêxistinanê xo yê sivîlan, cinîyan, ciwanan û rêxistinanê xozayî dawetê fîraşayîya Newroza 2020î kenê. 

 

Her wextî ra zêdêr ma nêzdîyê azadîye yê! 

Û bawerî, qerardarî û hêvîya ma pêro wextan ra hîna bihêzêr ê!

Bi ruhê yewîya neteweyîye û ver bi haştîyêka rûmetêne

Ma do ser bikewê, teqez ma do ser bikewê...