WAN - Cinîyan dîyar kerdî ke ganî tecrîdê serê Rayberê PKKyî Abdullah Ocalanî peynî bibo û vatî: “Wa kes bêveng nêmano, no bi no hewa nêeşkeno derbaz bibo.”

 

Netîceyê grevê vêşanîye de tecrîdê serê Rayberê PKKyî Abdullah Ocalanî dimayê 8 serran ra dima amebi wedaritene û 2ê Gulane, 22ê Gulane, 12 Hezîrane û 7ê Tebaxa 2019ine de avûkat şîbî pêvînayîş û keyeyî zî 12ê Tebaxe de şîbî pêvînayîş. La dimayê nê tecrîd reyna kewt teber û waştişê avûkatan û keyeyan ame redkerdene. Rojê vîyarte de Îmralî de şewat vejîyabi û serê reaksîyênî şarî ser o, keyeyê Rayberê PKKyî Abdullah Ocalanî û hepsîyê bîn Omer Hayrî Konar, Hamîlî Yildirim û Veysî Aktaşî pêvînayîş kerdibî. Dimayê pêvînayîşî cinîyan dîyar kerd ke tecrîd hema zî dewam keno.

 

‘Ma qebul nêkenê’

 

Muhteber Bora ke Artemêtê Wanî de ciwîyena, arde ziwan ke ganî tecrîdê serê Abdullah Ocalanî bi peynî bibo û

Wina vat: “Tecrîdê serê Rayberî, serê şarê Kurdî yo. Ganî kurdî wirzê serê lingan û cayê xo nêvinderê. Ma nê qebul nêkenê.”

Sînem Bore zî reaksîyon vera tecrîdî da û reaksîyonê xo wina ard ziwan: “Ganî kes bêveng nêmano, no wina nêeşkeno derbaz bibo.” 

 

‘Wa kezeba dayîkan nêveşo’

 

Cemîle Akbane zî dîyar kerde ke ganî êdî aştî bibo û rayîrê nê zî Îmralî ra derbaz beno û wina qedêna: “Wa kezeba dayîkan êdî nêveşîyo.”

 

Emîne Demîragaçe zî wina va: “Îqtîdar nêwazeno ke şarê Kurdî aştîye biwazê. Pêvînayîşê bi Abdullah Ocalanî dir zî semedê nê yenê astengkerdene. Êdî ma hizur û aştîye wazenê.”