Şehrîban Abî

 

WAN - Cinîyê ke hêrişê DAIŞî yê hemverê Vakur û Rojhelatê Sûrîye domananê xo vindî kerdê, vatî: “Çi karê Tirkîya herra Rojawanî ser o esto? Wa problemê şarê welatê xo çareser bikerê. Wa no zîhniyetê şerî êdî peynî bibo.”

 

Hêrişê Hêzê Çekdarî yê Tirk (TSK) û komê girêdayê ci yê ke hemverê Vakur û Rojhelatê Sûrîye de 9ê teşrîna verêne 2019ine de amebi destpêkerdene dewam kenê û bi hêrişan de bi seyan kesî cuya xo vindî kerdî û bi hezaran kesî zî cayê xo ra bî. Cinîyê ke domanê înan têkoşînê hemver çeteyê DAIŞî de cuya xo vindî kerdî veng dayî hukmatî ke ganî şer peynî bibo.

 

‘Wa peynîya nê şerî bîyarê’

 

Hatîme Durmaza ke lajê ci Kobanî de hêrişê DAIŞî de cuya xo vindî kerd û wina vat: “Lajê mi vat, ‘wijdanê mi dest nêdano, şarê ma uca de yeno qetilkerdene, ez nêeşkena tîya rehet roşî.’ Pêwa pêro hewldayîşî mi vernî nêgirewt. Vat, ‘ez şina Stenbolî de xebityena.’ 4 mengî ra dima ez musaya ke şîyo Rojawan. A roje ra heta nika hêrişê hemver Vakur û Rojawanê Sûrîye dewam kenê. Wa êdî dayîkî nêbermê. Wa peynîya nê şerî bîyarê. Ma Kurdî heqê xo wazenê. Ma xeylêk şehîd dayî. Ganî ma heta peynî têkoşînê înan dewam bikerê.”

 

‘Gerek ma semedê domananê xo dest bidê yewbînan’

 

Sîsê Şeybake zî serrê 90î de Mukusê Wanî ra semedê sîstemê qorîcîtî koç kerda vat: “Tedayê hemverê Kurdan bi serran o dewam keno. Se beno wa bibo, ganî ma fek têkoşînê xo ra vera nêdê. Ma dayîkî aştîye wazenê. Domanê ma hêrişê DAIŞî de cuya xo vindî kerdî. Semedo ke domanê ma nêmirê, ganî ma bi şarê Tirkîya dir destê xo bidê yewbînan.”

 

‘Tirkîya wa problemanê xo çareser bika’

 

Ayşe Nîlîme zî tecrîdê serê Rayberê PKKyî Abdullah Ocalanî arde vîr û da zanayene ke pêwa pêro vengdayîşê aştîye, Tirkîya polîtîkayê îqtîdarî nêvurnena û wina vat: “Çi karê Tirkîya Rojawanî de esto? Wa welatê xo rê semedê probleman çaresîyan bîyaro. Kêna mi nika Rojawanî de têkoşîn kena. Wa domanê mi nêmirê. Wa no zîhnîyetê şerî peynî bibo.”