Fîlîz Zeyrek

 

MERSÎN - Fatma Yurdaura ke 11 serrî yo vilê sosinan roşena, hewl dana ke bi nê debara 4 domananê xo bikero. Fatmaye, pitika xo ya qije kena pişta xo û pêwa şert û mercê hewayî zî kuçeyan de sosinan roşena û veng dana selahîyetdaran ke rewşa aye bêra vînayene.

 

Fatma Yurdaura ke merkezê Mersînî de kuçeyan de heta şan de vilê sosinan roşena, têkoşînê cuye dana. Fatmaye vewre û varanî de zî pitika xo gêna verê xo û pey nanê xo geyrena. Fatmaye semedê debara xo bikero û 4 domananê xo biewno mîyanê şertê wina de xebityena.

 

‘Semedê nanê xo bi pitika xo dir kuçeyan de geyrena’

 

Semedê ke mêrdeyê aye nêxebityeno, Fatmaye xebityena û pitika aye hema 8 mengî ya. Fatmaye nêeşkena domana xo ya qije keyeyî de verdo û domana aye tewr pîl zî 11 serrî ya. Fatmaye dîyar kena ke ganî nê serdî de do domane aye nêweş bikewo la mecbûr a bixebityo û wina vat: “Bi 11 serrî nê karî kena. Ez kena erebokê pitikan û vejîyena. Ma binê şert û mercê zehmetî de nanê xo vejenê.”

 

‘Heyf ke ercê keda cinîyan çin o’

 

Fatmaye ke wexto xebityena zî xeylêk probleman dir rî bi rî manena wina vat: “Kuçe semedê cinîyan asayîş nîyê. Heyf ke ercê keda cinîyan çin o. Pêwa nê hewl danê ke serê lingan de bimanê. Ma nêwazenê hewceyê kesî bibê. Ez wazena domananê xo bidî wendene. Qet nêbo wa karêke înan bibo.”

 

Fatmaye hîrê qevdê sosinan bi 10 TL roşena û vat, pêwa emsar vayîye ci arda war zî sey verê nînê rotene û wina vatene xo qedêna: “Ez selahîyetdaran ra semedê hewceyî û perwerdeyî domananê xo hetkarî pawena.”