Medya Uren

 

RIHA - Ewro 8ê Adare yo û bi hezaran cinî taciz, tecawiz, kiştiş û kedwerdişî de biherikîyê wareyan. Hunermend û mamosteya resimî Rahîme Sîdare, dîyar kerde ke hêzê cinîyan esto ke vera hişmendîyê serdest ê camêrdan xo bi rêxistin bikerê û têkoşîn bikerê.

 

Ewro 8ê Adare yo û bi hezaran cinî bi sloganê, “Ma do xoverdayîş bi rêxistin bikerê û ver bi azadîye rê rayîra şêrê” herikyenê wareyan. Dayîk, ciwan, kal, wendekar, mamoste, kedkar, sîyasetmedar, akademîsyen û bêkar do wareyan de waştişanê xo bîyarê ziwan. Emsar Riha de bername û çalakîyê rengîn ameyî kerdene. Hunermend û mamosteya resimî yê Komeleya Cinî Ciwîyayîş a Rahîme Sîdare qalê 8ê Adare kerd û vat cinî do pîya semedê azadîya komel û cinîyan wareyan de bê.

 

‘Ma eşkenê xo bi rêxistin bikerê’ 

 

Rahîme destpêkê qiseykerdişê xo de vat 8ê Adare sembolê têkoşînê cinîyan ke ganî cinî her roje bikerê roja rêxistinbîyayîş û têkoşînî. Rahîme wina dewam kerde: “Cinî û keda cinî her wextî de bîyê bingehê gamê pîl. Eynî wextî de her wext nêvînaye ameye vînayene. Cinî sey cinsê diyîn û hêrîn yenê vînayene. Cinîyê ke wayîrê keda xo vejîyayî, dest bi grev kerdî. Xeylêk cinî vanê ke ez semedo ke ez cinî û dayîk a, ganî ez keye de domanan wey bikerî, nêeşkena tebera bixebityî. Hepskerdişê cinîyan bi nê rengî yeno meşrûkerdene. La ganî hemverê nê hişmendîyî cinî dest bidê yewbînan û sere wedarnê. Cinî eşkenê her wareyî de bixebityê. Semedo ke hêzê cinîyan esto. Eynî wextî gerek semedê nê xo birêxistin bikerê.”

 

“Wa firçeyê ma ra rengê omidî biherîkîyo’

 

Rahîmeye qiseykerdişê xo de bale ante serê hunerê xo yê resimî û wina vat: “Ez resiman viraznena û resimê mi zî cuya cinîyan qalî keno. Her wext xetêk sîya esto. Wextê ko ez resiman xêz kena, ez xo vînena û ez hîsê xo ana ziwan. Coka pêro xêzê mi, dejê cinîyan qalî keno. Ez sey hunermendêk vana, ez nêwazena dej xêz bikerî. Wa firçeyê ma rengê omidî biheriknê. No zî tena piştdayîşê cinî de bi ca bêro. Ganî ma cinî pêro wareyan de cuya xo birêxistin bikerê û sere wedarnê. Eke ma sere nêdarê we do dejê ma tewr sîya biherîkîyê.”