STENBOL- Temsîlkarê rêxistinê cinîyan dîyar kerdî ke do 8ê Adare bi coş û serewedaritişê têkoşînê cinîyan derbaz bibo û vatî: “Ganî 8ê Adare de heme cinî, bi yew vengî serewedaritişê xo biqîrê.” 

 

Temsîlkarê rêxistinê cinîyan derheqê 8ê Adare de şîrove kerdî. Endama Cinîyanê Ciwananê Azadan (OGK) Tanya Karaye dîyar kerde ke her cayê dinya de cinî sere wedarênenê û vat: “Ma do Taksîm de kuçeyan pirr bikerê. Ma do 8ê Adara emsarî bi xoverdayîş û coşêk pîl pêşwazî kenê. 8ê Adare do bi grevê cinîyanê enternasyonal hîn birêxistin bibo. Ma cinîyê unîversîta do her wext vera tacîzê unîversîteyan, vera rektoran, profesoran ciwîyayîş vindarnê. Semedo ke ma cinî unîversîteyan û xeylêk wareyê ciwîyayîşî de rastê tacîz, tecawiz û qetilkerdişan yenê. No semed ra ma do ciwîyayîş bipawê. Ma do sere wedarnê û ciwîyayîş vindarnê.”

 

‘Ma têkoşînê xo girs kenê’

 

Cinîyanê Demokratî yê Newe (YDK)  Sînem Ozkane zî arde ziwan ke Kadikoy de bi waştişê xo bêrê têhet û wina vat: “Şîdetê serê cinîyan dewam keno. Hemverê destkewtişê cinîyan hêriş dewam keno. Ma zî vera nê hêrişan têkoşînê xo pîl kenê. Kiştişê cinîyan zêde bîyo. Merdişê biguman zêde bîyê. Merdişê Nadîra Kadîrova wina bi. Aqûbetê Gulîstan Dokuye nîno zanayene. No het ra gerek ma têkoşînê xo girs bikerê.”

 

‘Adetêko têkoşînî esto’

 

Cinîyanê Anarşîst ra Sîbel Çopute zî bale ante serê têkoşînê 8ê Adare û wina vat: “Bi serran o no têkoşîn bi rêxistinî dewam keno. Hetêk ra çîyêko kelecanî dano ma 8ê Adare yo. Her çar hetê dinya, serewedaritiş de yê. Têkoşînê cinîyan vera şer, krîz û şîdetî esto. Coka 8ê Adare do bibo roja berzkerdişê qêrînayîşê cinîyan.”

 

8'Adarê Kurdî.docx görüntüleniyor. Sayfa 1/2