Safîye Alagaş - Ferhat Çelîk

 

STENBOL- Rayberê PKKyî Abdullah Ocalanî 8 mengî ra dima pêvînayîş kerd û vat: “Her çi pabesteyê têkoşînê şima yo. Eke şima aver şorê her çi çareser beno. La eke şima aver nêşorê pêro meseleyî dewam kenê. Hem tecrîd dewam keno hem zî gonîye rişîyena. Destê şima ra çî yeno bikerê.”

 

Keyeyê Rayberê PKKyî Abdullah Ocalanî, Omer Hayrî Konar û Veysel Aktaşî 2 Adare de şî Îmralî û Zindanê Tîpê Fyê Asayîşê Berzî pêvînayîş kerdî. Hamîlî Yildirim zî seba ke nêweş bi, nêeşkabi keyeyê xo dir pêvînayîş bikero. 

 

Mehmet Ocalano ke bi Abdullah Ocalanî dir pêvînayîş kerd, derheqê pêvînayîşî de qalî kerd. Mehmet Ocalanî, derheqê pêvînayîşê Îmralî de zanayîş da: “Nêzdîyê 8 mengî yo ma nêeşkayîne şêrê pêvînayîş û ma pêvînayîş nêkerdêne. 15 rojan reyke semedê ma pêvînayîş bikerê, ma bi rayîrê avûkatanê xo muracatê Serdozgerîya Komara ya Bûrsayî kerdî. La cewab nêdayî ma. Reyna sebebê cîya ramojnenê. Dimayê ke girawe de şewat vejîya, na rey muracatê ma ame qebulkerdene.

 

‘Cigêrayîşêk bêmerdimayî kerdî’

 

Ma girawe de zî zîndan de zî bi hawayêkê bêhuqûqî ameyî cigêrayene. Dişeme (2 Adar) zanayîş ma rê ame û bi rayîrê avûkatan vatî, eşkenê şêrê girawe. Ma zî ameyî Îmralî. Ez û birayê Omer Hayri Konar û Veysi Aktaşî pîya şî Girawe. Ez eşkena wina vajî. Ma Qereqolê Gemlikî de cigêrayîş ra derbaz bî. Cigêrayîş normal nêbi, la ma vajê normal o. Cigêrayîşêk merdimî qij vistêne û heqaret bi. Sey însanêk nêeşkena çîyêk wina qebul bikerî. Cigêrayîşêko zaf xirap kerdî. Merdim nêeşkeno çîyêk wina qebul bikero. La ma mecbûr qebul kerd. Cigêrayîşo diyîn de her kes amebi uca. Kesê bi pîle, verçimkê sîya, esker pêro bi çek bî. Sey rewşa îstîsnayî bi. Heme kesî uca de bî. Ma cigêrayîşêko zaf xirab ra derbaz bî. Ma keştîye ra peya bî, verê ma de heta nokta diyîn ê cigêrayîşî ameyî. Her ca esker û gardîyan bî. Ma mecbûrî nê cigêrayîş qebûl kerd. Ê zî zanê kes keyfî ra cigêrayîş qebul nêkeno. Cigêrayîşê bêhuqûqî bi.

 

Sebeb şewat nîyo

 

Dima Ez Serekî reyde ameya têhet. Persa ke ma senî ameyî. Mi tira va ke semedê şewatê Îmraliyî ma ameyî. Serekî vat hayîya ci pê esta û rewşa înan baş a. Dima vat: “Ez to rê tay çîyan pers kena. Ti zî bi xulasî qala nînan bike.' Persa ke derheqê çaresarîya krîzanê Rojhelatê Mîyanênî de fikrê şarî çi yo, çareserîya meseleya kurdan senî bena û kam eşkeno na mesele çarser bikero.

Mi vat ke se ra 80-90ê şarî vano ke têna Serek eşkeno na mesele çareser bikero. Serekî vat: 'Ez zî naye zanena mesele meseleya ma ya. Seba ke krîzê Rojhelatê Mîyanênî çarser biba ganî ma bihêz bibê.’

 

‘Eke masa hîrê lingî bo nêkewena’

 

Mi Serekî rê qala kongre kerd. Ey zî vat: “Tirkîya de masaya dilinge esta. Şima ganî bihêz bibê û bikerê ke bibê lingê hîrêyînî yê na masa. Eke masa hîrêlîng biba nêkewena. Kurdî lingo hîreyên ê. Estbîyayîşê nê lîngê hîrêyîn bi pîlkerdişî beno.

 

‘Ganî kesî şarî rê xizmet bikerê’

 

Ganî dezgehê seba şarî xizmet bikerê, seba xo ney. Medya bihêz bikerê. Paştî bidê ci. Ez xebatkaranê medyaya ma rê zî selam kena. Hem televîzyonan hem zî kovaran wa bihêz bikerê.

 

‘Eke şima bibê yew şima eşkenê çareserî viraznê’

 

Partî (HDP) mîyanê dezgehanê ma de dezgehêko tewr bihêz o. Partîye bi kede bena pîlêr. Seba nê şarî bedelê pîlî ameyî dayene. Wa her kes seba nê şarî têkoşîn bikero. Ez tîya de kena ke rayîrê çareserîye bivîna. Eke şima bibê yew şima eşkenê meseleyan çareser bikerê. Şima çareserîya bingeyîne yê.

 

Seba Rojawanî şîroveyê girîng

 

Seba Rojawan çareserîye na ya: Ganî hêzê Rojawanî mîyanê yewîya Sûrîye de hîna bihêz bibê. No seba yewparetîya Sûrîye hewce yo. Eke Rojawan de kurdî, erebî, armenîyî û xirîstîyanî hêzêk nêbê yewîya Sûrîye nêna caardene. Stratejîya Rojawanî Sûrîye de raşt a. Ez pêro kedkaran, xebatkaranê Rojawanî rê selam kena.

Eke şima bihêz bibê şima eşkenê her çi çareser bikerê. Şima neçare yê ke dezgehê xo bihêz bikerê. Eke şima weş bixebitê şima eşkenê netîce bigêrê. Yanî ganî şima seba şexsan ney seba şarî bixebitê. Her çi bi têkoşînî beno. Eke hêz çinbo kesêk nêeşkeno meseleya kurdî çareser bikero. Ganî şima bibê lingê hîreyînî yê masaya Tirkîya. No zî bi hêzî beno. No bi kede beno.  Ez her kesî rê ke Rojawan de, Başûr de, Rojhelat de û Ewropa de vera tecrîdî têkoşîn kenê selam kena. Rewşa weşîye ya mi baş a.’

 

‘Çi destê şima yeno bikerê’

 

Wexto ke pêvînayîş qedîya ez Serekî ra persaya ke 'Reyna pêvînayîş do bibo?' Serekî zî vat: 'Her çi pabesteyê têkoşînê şima yo. Eke şima aver şorê her çi çareser beno. La eke şima aver nêşorê pêro meseleyî dewam kenê. Hem tecrîd dewam keno hem zî gonîye rişîyena. Her kes ganî goreyê naye çi destê ci ra bêro wa bikero.' ''