ENQERE - Goreyê dayeyê ajansê ma, menga sibate de 34 cinî ameyî kiştene. Sey her rey, dadgerî cezayê hêrişkaran û kiştoxan kêm kerd û fehmê xo yê pawitişê camêrdan dewam kerd. 

 

Kiştiş û hêrişê zayendî yê hemverê domanan her ke şino Tirkîyaye zêdeyîr beno. Polîtîkayê ke yenê awankerdişê û ceza nêgirewtişê sucdaran hûmara kiştişî û hêrişê cinsî yê hemverê domanan zêde keno. Platformê Ma do Kiştişê Cinîyan Vindarnê (KCDP) raporê xo yê menga sibate eşkera kerdib. Goreyê raporî 22 cinî mîyan de menga sibate de ameyê qetilkerdene. 

 

Goreyê xeberanê ma yê derheqê kiştiş û hêrişê cinsî de ma dayeyêk vet. Goreyê dayeyê ma menga sibate de 34 cinî ameyî kiştiş. 20 cinî hetê nasanê xo ra ameyê kiştiş û merdişê 14 cinîyan zî bi guman o. Heto bîn ra ame waştene ke 2 cinî bêrê kiştene. Eynî wextî de xeylêk cinî zî bi hêrişê zayendî dir rî bi rî mendê. Menga sibate de 2 domanî ameyî kiştene û xeylêk domanî zî hêrişê cinsî dir rî bi rî mendî. Sey her wext reyna dadgerî camêrdan pawit û cezaya kêm da kiştoxan.