MERKEZÊ XEBERAN - Vizêr Çîn de 71 merdim Vîrusê Covid-19 ra merdî û goreyê hûmaranê fermî tewrê înan 2 hezar û 663 kesî vîrus ra merdî. Vîrus tena Çîn de nê vilayê 26 welat û herêman bîye. Derheqê babete de WHO îqaz kerd ke ganî dinya hetê vilabîyayîşê vîrusî de amadekarîyanê xo bikera.

 

Vîrusê Korona (Covid-19) ke 12ê kanûna 2019î de bajarê Çînî yê Wuhanî ra vejîya raşte, vila beno. Goreyê raporê peynî yê Komîteya Weşî ya Neteweyî ya Çînî 24 saetanê peyênan de 71 kesî Vîrusê Korona ra merdî. Goreyê raporî pêropîya heta nika 2 hezar û 663 kesî vîrus ra merdî. Rêxistina Weşî ya Dinyaye (WHO) ya NYyî îqaz kerd ke ganî dinya hetê vilabîyayîşê vîrusî de amadekarîyanê xo bikera.

 

Çîn werdê heywanan û bazirganîya înan qedexe kerd. WHO veng da ke ganî pêroyê dinya vera vîrusî de amadekarîyanê xo bikera. Mudirîya Pêroyî ya WHOye eşkerayîya xo de daye zanayene ke hedîseyê vilabîyayîşê vîrusî yê welatanê Îtalya, Koreya Başûr û Îranî merdiman keno şik mîyan û tersê zaf tehlukeyin î. WHO îqaz kerd ke ganî dinya hetê vilabîyayîşê vîrusî de amadekarîyanê xo bikera.

 

Mudirê Pêroyî yê WHO Tedros Adhanom Ghebreyesus kombîyayîşê çapemenîye yê Cenevre de wina va: “Seba vernîgirewtişê vilabîyayîşê vîrusî û dermanê vîrusî bêro vînayene, xebatê hîra yenî kerdene. Heto bîn de zî seba ke no vîrus vilayê pêroyê dinya nêbo, çi destê ma ra yeno ma kenî.

 

Vîrusê Korona teberê Çînî vilayê 26 welat û herêman zî bî. Ewropa de tena welatê Îtalya de 219 weqayê vîrusî ameyî tespîtkerdene. Înan ra 6 kes merdî, 11 kesî zî karantîna de yî. Goreyê dayeyanê fermî yê Îranî heta nika 12 kesî Vîrusê Korona ra merdî. Labelê parlementerê Qumî Ehmed Amîrabadî Farahanî dîyar kerd ke tena no bajarî de 50 kesî merdî.

 

Balyozê Çînî yê Rusya Zhang Hanhuî dîyar kerd ke zanyarê Çînî aşîya Vîrusê Korona vînayî. Zhang da zanayene ke aşîya vîrusî nika testê peyênan de ya.