ÊLIH - 10in roniştişê dewaya raya pêroyî de sey, ‘Dewaya fuhuşî yê Êlihî’ yeno zanayene ke domanêk rê fuhuş amebi ferzkerdene, ame vînayene. Dewa, 1in Dadgeha Cezaya Giran ya Êlihî de ameye vînayene û pêro gumanbarî bi tahlîye ameyî xelatkerdene.

 

Gazete Şûjino ke bi KHKyî ame padayîş, 12ê Gulana 2017 de Êlih de, hedîseyê hêrişê cinsî yê sîstematîk ke vera domanêk vetib werte û dima cû dewa amebî akerdene. 10in roniştişê dewa, 14ê Sibate de 1in Dadgeha Cezaya Giran ya Êlihî de amî vînayene. Roniştiş de gumanbarêko newe yê bi nameyê Veysî Gormuş vejîya meydan. Heyetê dadgehe seba îfadeyê Veysî Gormuşî bêro girewtene û hetê kêm temam bibê, roniştiş taloqê menga Nîsane kerd.

 

Domana ke bi hêrişê zayendî dir rî bi rî mende, îfadeyê dozgerîye de dîyar kerdibî ke wayîrê dikanê kuafurî verê ci de xebityaya, Yildiz Çelîke fuhuş ci rê ferz kerdo. Domane wina vatib: “Yildize vat, ‘vîdeoyê to esto. Ez o keye û pîyê to rê ramojnî.’ Ez tirsaya. Mi xebata xo dewam kerd.” Domane vat, rastê hêrişê îstîsmarê Heves Tinig, Mehmet Şakîr Aygan û keso bi nameyê ‘Muxtar’ ameya û nê kesan pere dayne Yildiz Çelîke.

 

Serdozgerîya Komare ya Êlihî qerarê nimtişê seba dosya da û Yildiz Çelîk, Eflatun Emluk, Mehmet Şakîr Aygan, Heves Tinig û K.T 17ê Nîsana 2017 de ameyî tepiştene. Dima cû roniştişê peyîn de pêro gumanbarî ameyî tahlîyekerdene. Roniştişê 10in de zî tu averşîyayîş çinbi û pêro gumanbarî bê tepişnayîş yenê muhakemekerdene.