WAN - Gewê Aslana ke di lajê ci tepişnayeyê, dîyar kerde ke surgunkerdişê hepsîyan zulm o û da zanayene ke bi desan rey waştişname selahîyetdaran rê nuşta la cewabêk nêgirewta.

 

Îhlalkerdişê heqan yê zindanan roj bi roje zêde benê. Surgunkerdişê hepsîyan, sey polîtîkayê cezakerdişê keyeyan û tena verdayene hepsîyan yeno ercnayene û na babete de pêwa ke xeylêk waştişname ameyî dayane zî cewabê înan nîno girewtene. Yew zindanê ke bi îhlalkerdişê heqan rojeve de yo zî Zindanê Tîpê T yê Bandirmayê Balikesîrî yo. Gewê Aslana ke Wanî ra ya û di lajê ci zindanê Bandirmayî de tepişnayeyê û seba ekonomî nêeşkena şêro pêvînayîşê domananê xo. Pêwa ke bi desan rey waştişname nuşta zî cewabêk pozîtîf nêgirewta.

 

‘Surgun zulm o’

 

Lajê ci Murat Aslano ke surgunê zindanê Tîpê T yê Bandirmayî ame kerdene de wexto ke newe yeno tepiştene 40 rojî zindanê Tîpê L yê Panosî de mameno û dima cû zî surgunê Tîpê M yê Bayburtî kenê û Murat 7 serrî uca maneno û dima cû surgunê Bandirmayî kenê. Lajê Gewêye bîn Emrah Aslan zî Amed yeno tepişnayîş û surgunê zindanê Tîpê H yê Erziromî yeno kerdene. 4 serrî dima ra anê zindanê Tîpê T yê Wanî. Gewêye da zanayene ke bi serran o zindanan de geyrena û vat, no zulmêko pîl o, ganî lezabez nê caardişanra fek vera bidê.

 

Gewêye arde ziwan ke mêrdeyê ci di mengî verê krîzê qelbî derbaz kerdo û cuya xo vindî kerdo û wina vat: “Ez êdî mebûr a bixebityî. Nê şertan de ez nêeşkena şêrî pêvînayîşan zî.”