WAN - Seba erdlerzê bi pîlîyê 5.8 herêma sînorê Îran û Tirkîya de ame meydan, qezaya Elbakî ya Wanî de 3 ci ra domanî 7 kesan cuya xo vindî kerdî. Yeno vatene ke welatîyê binê enqazî de mendê zî estê.

 

Herêma serê sînorê Tirkîya û Îranî de saete derûdorê 08.52 bi pîlîyê 5.8 erdlerzêko ame meydan. No erdlerz tersêko pîl viraşt û her cayê Wanî de ame hîskerdene.

 

Dewê Gelenler, Xanik, Kaşkol û Elbisî yê girêdayê qezaya Elbakê Wanî de seba erdlerzî xeylêk keyeyî ameyî rijnayene. Ame vatene ke nê dewan de xeylêk welatî binê enqazî de mendê.

 

Wezîrê Karê Zerreyî Suleyman Soylûyî derheqê erdlerzî de îzahat da û da zanayene ke 4 ci ra pîl 3 zî domanî  7 welatîyan cuya xo vindî kerdê û heta nika 5 kesan zî wedarnayê nêweşxaneyan. Heta nika nameyê di welatîyê ke cuya xo vindî kerdê eşkere bîyê û nê zî Ferhat Tunca û Aydin Tosûn ê.

 

Yeno vatene ke hema welatî binê enqazî de estê û xebatê cigêrayîşî û xelaskerdişî dewam kenê.