Şehrîban Abî

 

WAN - Şabîke Keleşe, keyeyê xo de bi viraştişê nexşan pere qezenc kerd û dima cê zî bi nê qezencê xo loqanteyêko akerd. Şabîkeye loqante de hîrê cinî arde verê xo û înan rê zî wareyê îstîhdamî awan kerd. 

 

Cinîya bi nameyê Şabîke Keleşe ke Erdîşê Wanî de ciwîyena, berardişê bi destan viraştêne, rotine û pere qezenc kerdêne. Dima cû zî loqanteyêko werdî yê, ‘Mutbexê Leylaye’ akerd. Şabîkeye eynî wextî de cinîyan rê zî wareyê îstîhdamî awan kena.

 

‘Verê loqanteyî heqê ma ameyne werdene’

 

Şabîkeye arde ziwan ke verê loqante abikero, heqê ci ameyne werdene û wina vat: “Her wext meymanê ma estbî. Pêwa nê ma zaf aciz bîne. Keda ma nêameyne vînayene. Min û waya xo ma qerarêko girewt û ma loqanteyêko akerd. Seba nê ma xeylêk hewl da. Ma bi endîşeyêko pîl akerd. Ma va, gelo do karê ma bibo yan ney. La eleqeyêko pîl dî.”

 

‘Gama ke camêrdan xebatkarê cinîyan dîne nêameyne loqante’

 

Şabîkeye wina vat: “Vernê de camêrdan vatêne, ‘cinî xebityenê’ û nêameyne loqante. Loqanteyê ma bi pakî eleqe dî. Mitbexê ma akerdebi. Werdê ma verê çimanê muşterîyan de ameyne viraştene. Ma bi dîqetêko pîl amade kerdêne. Ma keyeyê xo senîn pak kerdêne, loqanteyê xo zî wina pak kerd. Ekonomî semedê cinîyan zaf girîng a.”

 

‘Seba krîzî kes nêeşkeno çîyêk bikero’

 

Şabîkeye eynî wextî de bale ante serê krîzê ekonomî û wina vat: “Seba krîzî tesîrêko pîl serê karê ma de bi. Semedo ke însanî teber de nan biwerê, cêbê înan de pere nêmaneno. Semedê nê zî nêeşkenê bêrê loqanteyê ke sey yê ma. Dikanê ma kîra bibayîne, ma nêeşkayne nê karî bimeşnayîne. Merdimî nêeşkenê debara xo bikerê. Semedê krîzî însan nêeşkenê çîyêko rehetî bikero. Ma zî zêde qezenc nêkenê. La ez hewl dana ke heqdestê embazanê xo yê cinîysn bidî. Mi wareyê piştdayîşê cinîyan û îstîdamî akerdo coka no şert o.”