Dîlan Babat

 

ENQERE - Endamê Tora Pawitişê Cinîyan bi sloganê, ‘Ma ciwîyayîş newe ra awan bikerê’ seba 8ê Adare xo amade kenê û do xeylêk bernameyan zî organîze bikerê. Buse Uçere veng da cinîyan ke vejîyê meydanan û vat: “ Ma semedo ke heqîqet vejê meydan yenê. Sey yê Las Tesîsî de, do bibo prosesê teşîrkerdişê gumanbaran.”

 

Endamê Torra Pawitişê Cinîyan emsar bi sloganê, ‘Ma ciwîyayîş newe ra awan bikerê’ xo seba 8ê Adare amade kenê. Torre ra Buse Uçere derheqê plansazîyê 8ê Adare de qisey kerde û vat: “Ma kampanyaya xo ya 25ê teşrîna peyêne bi sloganê, ‘ma wazenê bidê ciwîyayîş’ rêxistin kerdib. Derdê ma tena boygirewtene nîyo. Ma wazenê ke her wareyî de vajê ke ma wazenê cuyêka newe awan bikerê.”

 

‘Ma wazenê grevêko pîl ê femînîstan bi rêxistin bikerê’

 

Buseye derheqê çalakîyanê 8 Adare de zanayîş da û vat: “Nê prosesî de ma seba çalakîyanê 8ê Adare xo amade kenê de ma wazenê cinîyan bernameyê xo yê Mor Mekanî de bîyarê têhet. Bi babeta ‘heqê cinîyan çi yo?’ bi embazê avûkatan dir perwerdeyê ma bibo. Ekolojî ra heta xebatê cinîyan ma koman awan kerdî. Serê nê komê xebatanê Mor Mekanî de munaqeşeyê grevêko pîl yê femînîst ma kenê. Ma bi grevê femînîst yenê. Belkî ma emsar nêeşkenê bi hewayêko hîra xo rêxistin bikerê la 2021 de wa her kes bipawo, waştişê ma oyo rêxistinkerdişê grevêko pîl yê femîstî yo.”

 

‘Cinî do piştperdayan werte ra wedarno’

 

Buseye da zanayene ke cinî bi têkoşînê xo, polîtîkayê AKPyî peyser verdayê, bi hukmî peyser game dayê eştene û têkoşînê cinîyan dewaya Şule Çete de nimûne da û vat: “Hedîseyê Rabîa Naz û Gulîstan Dokuye esta. Nê hedîseyî zelal nîyê. Ma seba ke nê piştperdeyan wedarnê yenê. Ma seba heqîqet vejê meydan yenê.”

 

‘Ma vengdayîşê rayşîyayîş û mitîngî kenê’

 

Buseye tewr peyîn qiseykerdişê xo de arde ziwan ke ganî her cayê Tirkîya de qetî cinî şêrê çalakîyanê 8ê Adare û vat: “Ma do Enqere de 8ê Adare de bi Platformê Cinîyan ê Enqereyî dir rayşîyayîşêko bikerê. Kolej ra heta Kuçeyê Sakaryayî do rayşîyayîş bêro kerdene û saete 14.00 de do dest pêbikero û Meydanê Sakaryayî de zî do mîtîng bêro viraştene. Ma cinîyan pawenê Mor Mekanî û munaqeşeyê şewe ya femînîst.