Rojda Seyidxan

 

QAMIŞLO - Mamoste û wendekarê şaristanê Dêrikî 21ê Sibate Roja Ziwanê Dayîke ya Dinya pîroz kerdî û vatî: ”Hîsêko zaf weş o ke merdim bi ziwanê dayîke xo qisey bikero. Ziwanê dayîke nasname û bîyayîşê ma yo. Ziwanê Dayîke ameyoxê ma yo û ma qetî bipawê.”

 

Serra 2012ine de Ziwanê Kurdî bi rengêko fermî wendegehê Rojawanî de aktîf bi. Sewîyeya musayîşê ziwanî, mîyanê wendekaran de resayo cayêko baş. Bi coşêko pîl musayîşê ziwanî mîyanê keye û wendekaran de aver şino. No zî heskerdene û girêdayîşê bi herre û ziwanê dayîke ramojneno. Derheqê 21ê Sibate Roja Ziwanê Dayîke ya Dinya û girîngîyê ziwanê dayîke de mamoste û wendekarê wendegehê Ebd- El Mesîhî yê şaristanê Dêrikî yê kantonê Qamişloyî wina vatî: “Musayîşê ma bi ziwanê dayîke cayê serfirazîyî yo. Ma do seba ameyoxê têkoşîn bikerê.”

 

‘Ma wazenê domanan semedê ameyoxêko azad bimusnê’

 

Mamosteya branşê Tarîxî Sara Rusteme derheqê sebebê qedexekerdişê Ziwanê Kurdî de wina vat: ”Seba polîtikayê bindestiyî û koletî yê serê şarê Kurdî de ameyne ferzkerdene, yew ci ra zî sebebê qedexekerdene Zimanê Kurdî yo. Heta roja ma ya ewro zî no sîyaset ameyo kerdene. Wazenê ziwan û kulturê ma yê Kurdan bidê xovîrakerdene. Tesîrê nê sîyasetî, heta roja ma ya ewro dewam de yo. Hîn keyeyî heta nika xo nê çî ra xelas nêkerdê, semedê nê hîn wext lazim o. Ma mîyanê têkilîyê wendegeh û domanan de yê. Amancê ma o yo ke ma domanan serê ameyoxêko azad de bimusnê.”

 

‘Ziwanê ma ameyoxê ma yo’ 

 

Wendekarê bi nameyê Rîm Şêxmûs û Semîn Ibrahîme 21ê Sibate firaz kerdî û wina hîsê xo ardî ziwan: “Ziwanê dayîka ma nasnameyê ma yo. Wextê vîyarte de wendegahan de wendişê ziwanê dayîke qedexe bi. Ziwanê erebî zî ma rê zaf zehmet bi. Her çî ma rê newe ameyne. Hîsê ma zaf gane yê ke ma ewro bi ziwanê xo musenê. No ameyox semedê ma yo û gerek ma wayîr vejîyê û helnayîş ra bipawê.”