Medya Uren - Berîtan Canozer

 

AMED - Şert û mercê cuya Fatma Geçere rastîya Tirkîya fînena verê çiman. Fatmaye 23 serrî ya û 2 domanê ci estê. Fatma reaksîyonê xo vera selahîyetdaran da û vat: "Dewlete hetkarî dana welatê bînan, la feqîrê welatê xo nêvînena. Eke no keye serê ma de birijyo, do hema newe aya bibê."

 

Fatma Geçere dewa Kabi girêdayê qezaya Sûrî ya Amedî de ciwîyena. Fatmaye 23 serrî ya û 2 domanê ci estê. Bi doman û mêrdeyê xo dir keyeyêko xirbe de ciwîyena. Keyeyê înan odeyêka û salonêke ra yeno meydan û verbi rijnayîşî yo. Asayîşê keyeyî çin o. Semedê hetkarîye Fatmaye muracatê xeylêk cayan kerdo la heta nika tu cewabêko nêameyo dayene. Bi hetkarîya cîranan, keye debare xo keno. Fatmaye da zanayene ke gelo selahîyetdarî bendeyê rijnayîşê keyeyî yê û dima ra do hetkarî bidê?

 

'Ma muracatê cayê fermî kerdî'

 

Fatmaye her wext mîyanê lebate de bîya ke seba hetkarî bigîro. Muracatê xeylê cayê fermî yê dewlete daya la heta nika tu cewabêko nêameyo dayene. Fatmaye wazena domanê aye şert û mercê baş de biciwîyê. Fatmaye rewşa xo wina arde ziwan: "Heyf ke çîyêk destê mi ra nîno û kesêk zî vengê mi nêeşnaweno. Eke no keye serê ma de birijîyo, dima cû do wijdan bidejê, la dimayê ke ma merdî, wijdan bidejo zî feydeyê ci çin o. Par zî xebera ma ameye viraştene û semedê ma hetkarî ameyî komkerdene. La hetkarîyê ke ameyî komkerdene nêdayî ma. Eynî wextî de seba hetkarî ma muracatê walîtî, qeymeqam û şaredarî kerd la cewabêko nêdayî. Tena şaredarî vat şêrê keyeyêko bîn û ma do 6 mengî kîrayê şima bidê. La dima ra ma do se bikerê?"

 

'Kesê ke nêciwîyê fam zî nêkenê'

 

Fatmaye verê cû domananê xo teslîmê vistewrîya xo kerdêne û şîne kar. La vistewrîya ci semedo ke felç derbaz kerd û aye êdî mecbûr manena ke ewnîyena domanan ra. Fatmaye wina veng da selahîyetdaran û vat: "Ez keyeyêko pîl, sarayêka pîl nêwazena. Ez keyeyêko qij wazena ke me ci de star bê. Wa domanê mi rehet rakewê. Eke çîyêk bêro sereyê ma, ganî bêro zanayene dewlete berpirsîyar a. Seba rewşa ke ma ciwîyenê ê nêciwîyenê û ma fam nêkenê zî."

 

'Êdî bes o'

 

Şert û mercê wina de rewşa psîkolojîyê Fatmaye xira bîya tewr peyîn wina vat: "Ma her tewir probleman ciwîyenê. Kar çin o, kar bibo pere tay o. Coka ma mecbûrê ke merdiş dir bicîwîyê. Xeylêk rey ez hêrsê xo domanan ra vejena. Ez nêeşkena waştişê domananê xo bi ca bîyarî. Ez nêeşkena domananê xo mird bikerî. Feqîrî û belengazî kerdê qedere mi. Êdî bes o! Vengê mi bieşnawê. Domananê mi nê rezîlî ra xelas bikerê."